Լեհաստանի նախագահն ընդունել է Դոնալդ Տուսկի հրաժարականը
Ռուսական ИТАР-ТАСС լրատվական գործակալության փոխանցմամբ՝ Լեհաստանի նախագահ Բրոնիսլավ Կոմորովսկին պաշտոնապես ընդունել է վարչապետ Դոնալդ Տուսկի կառավարության հրաժարականը: Այդ արարողությունն անցկացվել է նախագահական նստավայրում:
Տուսկը Եվրոպական խորհրդի նախագահ նշանակվելու պատճառով հարկադրված է եղել հրաժեշտ տալ Լեհաստանի վարչապետի պաշտոնին: Դրանով իսկ նախագահն ունի երկու շաբաթ, որպեսզի խորհրդարանին առաջարկի նոր վարչապետ: Սակայն ակնկալվում է, որ դա տեղի կունենա սահմանված ժամկետի ավարտից ավելի շուտ:
Մինչև փոխարինողների հայտնվելը, Տուսկն ու նրա նախարարները կշարունակեն կատարել իրենց գործառույթները: Լեհաստանի կառավարության նոր կազմը պետք է հայտնի դառնա հաջորդ շաբաթվա ընթացքում: Սեյմում նոր կառավարությանը վստահություն հայտնելը կարող է տեղի ունենալ սեպտեմբերի վերջին կամ հոկտեմբերի սկզբին:
