Պորոշենկոյին առաջարկել են Մաքսային միության երկրների ղեկավարների հետ հանդիպել Մինսկում
![](https://168.am/wp-content/uploads/2014/06/1403079476-5137-poroshenko-petr.jpg)
Բելառուսական BELTA լրատվական գործակալության փոխանցմամբ՝ Բելառուսի, Ռուսաստանի ու Ղազախստանի նախագահներ Ալեքսանդր Լուկաշենկոն, Վլադիմիր Պուտինն ու Նուրսուլթան Նազարբաևը պատրաստ են Մինսկում հանդիպել Ուկրաինայի նախագահ Պյոտր Պորոշենկոյի հետ՝ այժմեական հարցեր քննարկելու համար:
Այս մասին հայտարարել է Բելառուսի նախագահը. «Կա նման գաղափար, քանի որ առաջանում են մի շարք հարցեր: Դրանք առաջին հերթին կապված են ԵՄ-ի ու Ուկրաինայի միջև Ասոցացման համաձայնագրի ստորագրման հետ:
Մենք մեծապես մտահոգված ենք և մտավախություններ ունենք, որ ԵՄ-ի ապրանքներն Ուկրաինայի տարածքով զրոյական մաքսատուրքով չներթափանցեն Բելառուս, Ռուսաստան ու Ղազախստան և չխեղդեն մեր տնտեսությունները:
Դա բնական է, դա յուրաքանչյուր պետության մտավախությունն է: Եվ երկրորդ՝ Ռուսաստանի կողմից մի շարք ապրանքների ներկրման նկատմամբ բեռնարգելք դնելու հետ կապված՝ մեզ համար շատ կարևոր կլիներ Մաքսային միությունում քննարկել այդ, երկրորդ խնդիրը:
Ես իմ գործընկերներին ասացի՝ եկե՛ք Պյոտր Պորոշենկոյին առաջարկենք, որ միանա այդ և Ուկրաինայում առկա այլ խնդիրների քննարկումներին: Եթե նա ցանկանում է դա, ապա մենք կքննարկենք այդ խնդիրները, միևնույն է՝ դրանք ոչ մի տեղ չեն չքանա:
Ուկրաինայի համար դրանք չափազանց կարևոր են, քանի որ Ռուսաստանը դանդաղորեն կասեցնում է Ուկրաինայից մի շարք ապրանքատեսակների ներկրումը: Ոչ վաղ անցյալում բարձրացվեց արդեն ալկոհոլի հարցը, իսկ դրանից առաջ էլ՝ կաթի ու մսամթերքի հարցը»:
Լուկաշենկոն հավելել է, որ հանդիպման գաղափարը քննարկել է Ռուսաստանի ու Ղազախստանի նախագահների հետ, և նրանք պատրաստ են ժամանել Մինսկ: Ուկրաինայի նախագահի աշխատակազմի ղեկավարի տեղակալ Վալերի Չալին հայտարարել է, որ Գերագույն ռադան ԵՄ-ի հետ Ասոցացման համաձայնագիրը վավերացնելու է ընթացիկ տարվա սեպտեմբերին: