ՌԴ-ը «Միստրալ» ռազմանավերի համար Ֆրանսիային ամբողջովին կվճարի միայն երկրորդ նավի ստացումից հետո
Ռուսական ИТАР-ТАСС լրատվական գործակալության փոխանցմամբ՝ Ռուսաստանը «Միստրալ» տիպի բազմանշանակ դեսանտային նավերի կառուցման մասին պայմանագրով Ֆրանսիային ամբողջովին կվճարի միայն երկրորդ նավի մատակարարումից հետո:
Այս մասին հայտարարել է «Ռոսօբոռոնէքսպորտ» ընկերության գլխավոր տնօրեն Անատոլի Իսայկինը: Բացի այդ, Ռուսաստանին են փոխանցվելու տվյալ տիպի նավերի կառուցման տեխնոլոգիաները: Ուղղաթիռակիր նավերի համար վերջնական վճարումն իրականացվելու է հաջորդ տարվա նոյեմբերին:
Իսայկինը հերքել է, թե «Միստրալ» ռազմանավերի կառուցման տեխնոլոգիաները ռուսական կողմին հանձնելը կապված է ևս երկու «Միստրալի» գնման շուրջ պայմանագրի հետ:
«Միստրալ» նավերի շուրջ ռազմական գործարքը Ֆրանսիայաի ու Ռուսաստանի միջև ստորագրվել է 2011 թվականին, ինչն աննախադեպ էր ԽՍՀՄ-ի փլուզումից հետո Ռուսաստանի ու Արևմուտքի միջև հարաբերություններում: Գործարքը գնահատվել էր 1.2 միլիարդ եվրո:
Առաջին նավը՝ «Վլադիվոստոկը», պետք է Ռուսաստան հասցվի այս տարվա հոկտեմբերին, իսկ երկրորդ նավը՝ «Սևաստոպոլ», Ղրիմում Սևծովյան նավատորմը կհամալրի 2015 թվականին:
