Լիբերմանը հեռանում է Նեթանյահուից
Times of Israel-ի փոխանցմամբ՝ Իսրայելի արտգործնախարար Ավիգդոր Լիբերմանը հանդիպել է վարչապետ Բենիամին Նեթանյահուի հետ: Հանդիպման ժամանակ «Մեր տունն Իսրայելն է» կուսակցությունը գլխավորող Լիբերմանը հայտարարել է, որ վերջ է տրվում կուսակցության և «Լիկուդ» կուսակցության քաղաքական միությանը, որոնք 2013 թվականի խորհրդարանական ընտրությունների շեմին ձևավորել էին «Լիկուդ Բեյտեյնու» բլոկը:
Լիբերմանը հայտարարել է, որ բլոկից դուրս գալու հիմնական պատճառը ՀԱՄԱՍ-ի նկատմամբ Նեթանյահուի չափազանց մեղմ քաղաքականությունն է: Վերջին օրերին Իսրայելը զանգվածային հրթիռակոծության է ենթարկվում Գազայի հատվածից, սակայն Իսրայելի կառավարությունը վարում է զուսպ քաղաքականություն: «Լիկուդից» բաժանվելու մասին Լիբերմանի որոշումը կապված է նաև Կնեսետում անցկացված վերջին քվեարկության հետ:
