Սերժ Սարգսյանը ընդունել է Միջխորհրդարանական միությունում բրիտանական խմբի պատվիրակությանը
Նախագահ Սերժ Սարգսյանն այսօր ընդունել է Միջխորհրդարանական միությունում բրիտանական խմբի պատվիրակությանը` խմբի ղեկավար Ջոն Ուիթինգդեյլի գլխավորությամբ:
Նախագահը ողջունել է հյուրերին մեր երկրում, գոհունակությամբ արձանագրելով, որ պատվիրակության անդամներից ոմանք արդեն մի քանի անգամ այցելել են Հայաստան, քաջատեղյակ են հայ-բրիտանական հարաբերությունների օրակարգին և իրենց ավանդն ունեն երկկողմ փոխգործակցության զարգացման գործում: Սերժ Սարգսյանը հույս է հայտնել, որ մեր երկիր առաջին անգամ այցելող բրիտանացի մյուս խորհրդարանականները հնարավորություն կունենան այցի օրերին իրենց համար հնարավորինս բացահայտելու Հայաստանը: «Հայաստան-Միացյալ Թագավորություն հարաբերությունների խորացման գործում, իհարկե, ես կարևորում եմ միջխորհրդարանական համագործակցությունը, բրիտանահայկական խմբի գործունեությունը և վստահ եմ, որ այն աշխուժացումը, որ մենք տեսնում ենք վերջին երկու տարիների ընթացքում, արդյունք է նաև այդ խմբակցության, մնացած խորհրդարանականների ակտիվ մասնակցության: Իսկ այդ հարաբերությունների խորացմամբ մենք մեծապես շահագրգռված ենք»,-ընդգծել է Հանրապետության Նախագահը:
Սերժ Սարգսյանը կարևորել է նաև խորհրդարանականների այցելությունները Լեռնային Ղարաբաղ և շնորհակալություն հայտնել Միացյալ Թագավորության այն խորհրդարանականներին, ովքեր եղել են Արցախում, տեղում ծանոթացել ԼՂ պետականաշինության ընթացքին, որը, Նախագահի համոզմամբ, կօգնի նրանց բրիտանական հասարակությանը ներկայացնել օբյեկտիվ իրականությունը Արցախի մասին:
Շնորհակալություն հայտնելով ընդունելության համար՝ Մեծ Բրիտանիայի խորհրդարանի անդամները պատրաստակամություն են հայտնել շարունակել և ավելի ակտիվացնել Հայաստանին ու հայ ժողովրդին աջակցության իրենց ջանքերը, որոնք ուղղված են ինչպես հայ-բրիտանական երկկողմ կապերի ամրապնդմանն ու խորացմանը, այնպես էլ ՀՀ-ԵՄ հարաբերությունների հետագա զարգացմանը, Հայաստանի և նրա ժողովրդի համար կարևոր նշանակություն ունեցող խնդիրների լուծմանը: «Մենք բոլորս՝ Միջխորհրդարանական միությունում բրիտանական խմբի այս պատվիրակության անդամներս, ՄԹ խորհրդարանում լինելով տարբեր կուսակցությունների և խմբակցությունների անդամներ, համախմբված ենք Հայաստանին աջակից լինելու հարցում և մեզ համարում ենք Հայաստանի բարեկամները, ովքեր շարունակելու են իրենց առաքելությունն այս այցից հետո էլ՝ սպառիչ տեղեկությունների արդյունքում ավելի ամբողջական և լավ պատկերացումներով»,-Նախագահի հետ հանդիպմանն ասել են բրիտանացի խորհրդարանականները:
Հանդիպման ընթացքում Նախագահ Սերժ Սարգսյանը պատասխանել է նաև հյուրերին հետաքրքրող հարցերին, որոնք վերաբերել են Հայաստանի ներքին և արտաքին քաղաքականությանը, հայ-բրիտանական երկկողմ կապերի հետագա ամրապնդմանը, Հայաստան-Եվրամիություն հարաբերությունների ապագային և համագործակցության մտադրություններին ու ծրագրերին, Հայաստանի՝ Մաքսային միությանը միանալու որոշմանը, ինչպես նաև տարածաշրջանային խնդիրներին, ԼՂ հիմնախնդրի խաղաղ կարգավորման գործընթացին և այդ ուղղությամբ Հայաստանի ու միջազգային հանրության ջանքերին:
ՀՀ Նախագահի աշխատակազմ
