ԵՊՀ-ի Mass media գիտակրթական կենտրոնը և Հանրային հեռուստաընկերությունը հայտարարում են ընդունելություն
Հայաստանի հանրային հեռուստառադիոխորհուրդը համագործակցության առաջարկով դիմել էր Երևանի պետական համալսարան` համատեղ կրթական ծրագիր իրականացնելու առաջարկով, ինչին դրական արձագանքեց ԵՊՀ ղեկավարությունը: Արդյունքում՝ համատեղ կրթական ծրագիր իրականացնելու նպատակով Երևանի պետական համալսարանում հունիսին ստեղծվեց Mass media գիտակրթական կենտրոնը, որը և իրավունք ունի իրականացնել կրթական ծրագիրը: Այսպիսով, այս տարի ԵՊՀ-ի Mass media գիտակրթական կենտրոնը և Հանրային հեռուստաընկերությունը հայտարարում են ընդունելություն մագիտրոսական ծրագրերով: Այս մասին 168.am-ին ասաց ԵՊՀ-ի Mass media գիտակրթական կենտրոնի կրթական ծրագրերի ղեկավար Անուշ Մարտիրոսյանը` նշելով, որ ըստ այդմ կկատարվի ընդունելություն մագիստրոսական հետևյալ ծրագրերով`
1. Հաղորդավարական գործ,
2. Օպերատորական գործ,
3. Ռեժիսուրա,
4. Կառավարում (պրոդյուսինգ, գովազդային մենեջմենթ):
Ա. Մարտիրոսյանի խոսքով` դասընթացները կանցկացվեն Հայաստանի հանրային ռադիոյի շենքում, որտեղ այժմ վերանորոգման և վերազինման աշխատանքներ են կատարվում: «Տարածքի, սարքավորումների և այլ հարցերով զբաղվում է Հանրային հեռուստառադիոխորհուրդը, իսկ կրթական ծրագրերով`ԵՊՀ-ն»,- ասաց Ա. Մարտիրոսյանը` նշելով, որ ուսանողները հնարավորություն կունենան անմիջականորեն մասնակցելու հեռուստաարտադրության գործընթացին, և պարբերաբար վարպետության դասեր կանցկացնեն ոլորտի առաջատար մասնագետներ արտերկրից:
Ա. Մարտիրոսյանը նշեց նաև, որ սա ԵՊՀ-ի պատմության մեջ նորություն չէ, նման կենտրոններ և մագիտրոսական տարբեր ծրագրեր կան համալսարանում: Ա. Մարտիրոսյանը նշեց նաև, որ այս ծրագրով աշխատող լավագույն շրջանավարտները աշխատանքի կանցնեն Հանրային հեռուստաընկերությունում, իհարկե, միայն իրենց ցանկությամբ, քանի որ հետագա աշխատանքի ընտրության գործում ծրագրի շրջանավարտներն ազատ են լինելու:
«Կարծում եմ՝ այստեղ հեռուստաընկերությունները կկարողանան գտնել իրենց համար որակյալ կադրեր նեղ մասնագիտացումներով, իհարկե, այդ ամենի համար հաշվի կառնվի նաև պահանջարկը»,- ասաց Ա. Մարտիրոսյանը:
