ՀՀ-ն դիմել է ԵԱՏՄ-ին՝ բողոքելով ՌԴ-ի սահմանափակումների դեմ․ էկոնոմիկայի փոխնախարար
Հայաստանը դիմել է ԵԱՏՄ-ին՝ բողոքելով Ռուսաստանի կողմից հայկական ապրանքների ներմուծման սահմանափակումների դեմ: ԱԺ-ում լրագրողների հետ ճեպազրույցում հայտարարել է Հայաստանի էկոնոմիկայի փոխնախարար Տիգրան Գասպարյանը:
«Հայաստանը բողոք է ներկայացրել Ռուսաստանի կողմից հայկական ապրանքների նկատմամբ կիրառվող սահմանափակումների դեմ և հույս ունի, որ դրանք կհանվեն ԵԱՏՄ շրջանակներում գործող մեխանիզմների միջոցով: Կարևոր են ոչ միայն մեր շփումները Ռուսաստանի հետ, այլև մեր հնարավորությունները ԵԱՏՄ շրջանակներում, քանի որ կան կոնկրետ մեխանիզմներ, որոնք կարելի է կիրառել նման խոչընդոտները վերացնելու համար, և մենք ակտիվորեն օգտագործում ենք այդ հնարավորությունը։ Հույս ունենք և վստահ ենք, որ այդ մեխանիզմները պետք է աշխատեն խոչընդոտները վերացնելու համար»,- ասել է Գասպարյանը։
Նրա խոսքով՝ սահմանափակումները չեն համապատասխանում ԵԱՏՄ համաձայնագրերին և սկզբունքներին, և հենց այդ պատճառով Հայաստանը պայքարում է, որպեսզի ԵԱՏՄ-ն գործի իր սկզբունքներին համապատասխան:
