ԵԱՏՄ–Իրան առևտրի ծավալները չեն նվազում. Օվերչուկ
ԵԱՏՄ-ի և Իրանի միջև առևտրի ծավալները չեն նվազում Իսլամական Հանրապետության հետ ազատ առևտրի գոտու մասին համաձայնագրի շնորհիվ։ Այս մասին ասել է ՌԴ փոխվարչապետ Ալեքսեյ Օվերչուկը Արևելյան տնտեսական համաժողովի շրջանակում։
«Պայմանագիրը թույլ է տալիս պահպանել առևտրաշրջանառության ծավալները՝ չնայած Իսլամական Հանրապետության շուրջ ստեղծված անկայուն իրավիճակին», – ասել է ՌԴ փոխվարչապետը։
Միևնույն ժամանակ, նրա խոսքով, Իրանի շուրջ ստեղծված ներկայիս իրավիճակը ազդում է մինչև Պակիստան երկաթուղու կառուցման նախագծի վրա։
Օվերչուկը նաև նշել է`Իրանն առաջարկում է ԵԱՏՄ-ին պայմանավորվել ոչ սակագնային խոչընդոտների կարգավորման շուրջ։
«Վերջերս հանդիպել ենք Իրանի կառավարությունում առևտրային հարցերով զբաղվող գործընկերների հետ, և նրանք նույնպես բարձրացրել են այս հարցը։ Նրանք ասում են` շատ լավ, մենք համաձայնության ենք եկել սակագների շուրջ, եկեք բանակցենք ոչ սակագնային միջոցառումների մասին, քանի որ տեխնիկական կանոնակարգերի, հավաստագրման, անասնաբուժական և բժշկական վերահսկողության հարցերը ևս պետք է լուծվեն, որպեսզի մեր շուկաների միջև ապրանքների հոսքն ավելի արդյունավետ, ավելի արագ և մեր գործարար կառույցների համար հնարավորինս քիչ ծախսատար լինի», – հայտարարել է Օվերչուկը։
Նրա խոսքով՝ սա այն է, ինչպով ԵԱՏՄ-ն կզբաղվի առաջիկայում։
Հիշեցնենք, որ 2025 թվականի մայիսի 15-ին ուժի մեջ մտավ ԵԱՏՄ-ի և Իրանի միջև ազատ առևտրի մասին համաձայնագիրը, որը փոխարինեց 2018 թվականի ժամանակավոր համաձայնագրին: Նոր փաստաթուղթը նպաստում է Հայաստանի ազատ տնտեսական գոտու (ներառյալ «Մեղրի» ԱՏԳ-ի) և Իրանի ԱՏԳ-ի միջև համագործակցության զարգացմանը՝ պարզեցնելով առևտուրը և տարածաշրջանում ստեղծելով արդյունաբերական-լոգիստիկ կապեր:
