Դոնալդ Թրամփը Սպիտակ տուն վերադառնալուց հետո առաջին անգամ կայցելի Իռլանդիա
ԱՄՆ նախագահ Դոնալդ Թրամփը կայցելի Իռլանդիա՝ այցով, որը կտևի առնվազն երկու օր։ Press Association-ի տվյալներով, ուղևորությունը կմեկնարկի սեպտեմբերի 12-ին։
Ակնկալվում է, որ Թրամփը կայցելի Քլեր կոմսություն, որտեղ գտնվում է նրան պատկանող Trump International Golf Links & Hotel գոլֆային համալիրը Դունբեգում։ Ենթադրվում է, որ այնտեղ նա կմասնակցի Irish Open մրցաշարի հետ կապված միջոցառումներին, որի եզրափակիչ օրը կկայանա սեպտեմբերի 13-ին։
Այցի ծրագրում ներառված է նաև ուղևորություն դեպի Դուբլին, սակայն Իռլանդիայի մայրաքաղաքում նախատեսված միջոցառումների մանրամասները առայժմ չեն բացահայտվում։
Թրամփի նախորդ այցը Իռլանդիա տեղի էր ունեցել 2023 թվականին, երբ նա այցելել էր Դունբեգ։ Այն ժամանակ նրան դիմավորում էին աջակիցներ՝ ամերիկյան դրոշներով և Make America Great Again շարժման խորհրդանիշներով։
Միևնույն ժամանակ, Թրամփի՝ որպես ԱՄՆ նախագահի կարգավիճակով 2019 թվականի այցը ուղեկցվել էր լայնածավալ բողոքի ակցիաներով։ Այն ժամանակ Դուբլինի փողոցներ էին դուրս եկել բնապահպանական, ձախակողմյան, պաղեստինամետ, հակապատերազմական և այլ հասարակական շարժումների ակտիվիստներ։
Իռլանդիա այցելած ԱՄՆ վերջին գործող նախագահը Ջո Բայդենն էր։
2023 թվականին նա ժամանել էր երկիր՝ Բելֆաստյան համաձայնագրի 25-ամյակի առիթով՝ այցելելով Բելֆաստ, Դուբլին, ինչպես նաև Լաութ և Մեյո կոմսություններ, որտեղից սերում էին նրա նախնիները։
