Թուրքիայում գնդակոծվել է բարձրաստիճան զինվորականներին տեղափոխող ուղղաթիռը
Թուրքական Haberler.com լրատվական կայքի փոխանցմամբ՝ Թուրքիայի հարավ-արևելյան հատվածում գտնվող Հաքքարի նահանգի Յուքսեքօվա շրջանում գնդակոծվել է Թուրքիայի զինված ուժերի ուղղաթիռը: Միջադեպը գրանցվել է երեկ, տեղական ժամականով ժամը 18.40-ին:
Այս մասին այսօր հայտնել է զինված ուժերի Գլխավոր շտաբը: Վերջինիս հաղորդմամբ՝ S-70 տիպի ուղղաթիռում գտնվել են բարձրաստիճան զինվորականներ: Ուղղաթիռի ուղղությամբ արձակվել է 4 կրակոց:
Գլխավոր շտաբը հայտարարել է, որ հարձակումն իրականացրել են ահաբեկիչները՝ չմանրամասնելով, թե կոնկրետ որ կազմակերպությունը:
Հիշեցնենք, որ Իրաքին սահմանակից Հաքքարի նահանգում մշտապես ակտիվ գործունեություն է ծավալել «Քրդստանի աշխատավորական» կուսակցությունը (PKK), որի զինյալները Թուրքիան սկսել են լքել մայիսի 8-ից:
