Հազվագյուտ աստղագիտական երևույթ. ամռանը 2 մոլորակների մերձեցում է սպասվում
Ամռան սկզբին Երկրի բնակիչները կկարողանան ականատես լինել հազվագյուտ և տպավորիչ աստղագիտական երևույթի՝ Վեներայի և Յուպիտերի առավելագույն մերձեցմանը։ Այս մասին հայտնել է Ղրիմի աստղաֆիզիկական աստղադիտարանի գիտաշխատող Սերգեյ Նազարովը։ Մոլորակները միմյանցից նվազագույն հեռավորության վրա կհայտնվեն հունիսի 9-ին։
«Հիմա երեկոյան երկնքում հայտնվում է Վեներան, որն աստիճանաբար մոտենում է մեզ և օրեցօր ավելի մեծ ու պայծառ է դառնում։ Դրա տեսանելիության գագաթնակետը կլինի հուլիս-օգոստոս ամիսներին։ Վեներային ընդառաջ է գալիս Յուպիտերը։ Նրանք աստիճանաբար մերձենում են։ Հունիսի 9-ին մոլորակները նվազագույն հեռավորության վրա կլինեն միմյանցից։ Շատ գեղեցիկ աստղագիտական երևույթ կլինի»,- ասել է աստղագետը ՌԻԱ Նովոստիի հետ զրույցում։
Նրա խոսքով՝ Երկրից դիտելիս դա կողք կողքի գտնվող երկու արտակարգ պայծառ աստղերի տեսք կունենա։ Դրանք հնարավոր կլինի տեսնել անզեն աչքով, որևէ հատուկ սարքավորում չի պահանջվի։
Աստղագետները խորհուրդ են տալիս մոլորակները փնտրել մայրամուտից 1-2 ժամ անց՝ համեմատաբար մութ երկնքում։ Պարզ եղանակի դեպքում երևույթը տեսանելի կլինի Երկրի ցանկացած կետից։
