Իրավապահները փակել են պրոֆեսոր Չարչյանի աշխատասենյակի դուռը
Քիչ առաջ փաստաբան Էրիկ Ալեքսանյանն իր ֆեյսբուքյան էջում գրել էր, որ իրավապահները խուզարկում են պրոֆեսոր Արմեն Չարչյանի աշխատասենյակը։
168.am-ի հետ զրույցում վերջինս ասաց տեղյակ չէ, թե ինչ քրեական վարույթի շրջանակներում է խուզարկվում բժշկի աշխատասենյակը։
«Իզմիրլյան» ԲԿ-ում աշխատող մեր լրագրողի փոխանցմամբ իրավապահները փակել են պրոֆեսոր Չարչյանի աշխատասենյակի դուռը ու ներսում ինչ-որ գործողություններ են կատարում։ Նրանցից մի քանիսն էլ դրսում են։
Գործողությունները իրականացնում են Քննչական կոմիտեի աշխատակիցները։
«Քրեական վարույթի նախաքննության ընթացքում կատարվում են քննչական գործողություններ»,-ասել են Քննչական կոմիտեից։
Նշենք նաև, որ պրոֆեսոր Չարչյանի աշխատասենյակում են նաև նրա փաստաբանները։
Գործողություններ են իրականացվում նաև Բուժական գծով փոխտնօրեն Բ.Գ.Թ. Տիգրան Նալբանդյանի սենյակում։ Քննչական կոմիտեի կնիքով փաթեթ էր միջանցքում։
Խուզարկում են նաև Ֆինանսական գծով փոխտնօրեն Վաղարշակ Մեյրոյանի սենյակը։
Իրադարձությունների զարգացմանը հետևեք 168.am-ի ուղիղ եթերում։
