«Նույնիսկ ԿԳԲ-ն ռիսկ չէր անում խոչընդոտել մեր աշխատանքը… Այս անձանց մոտ բարոյական տաբուներ չկան, և սա ամենավտանգավոր տեսակն է»
Իշխանությունը Գրողների և Նկարիչների Միությունների շենքերը պետականացնելու գործընթացը մեկնարկելուց գրեթե մեկ տարի անց որոշել է պետականացնել նաև Ժուռնալիստների միության գույքը։
Վերջերս «Քաղաքացիական պայմանագիր» խմբակցության պատգամավոր, նախկին լրագրող Սիսակ Գաբրիելյանը ֆեյսբուքյան իր էջում գրել էր. «Ժուռնալիստների միության գույքը պետք է վերադարձվի ՀՀ սեփականությանը. հայցն արդեն մուտքագրվել է դատարան, հարուցվել է նաև քրեական գործ»:
«Գլխավոր դատախազությունից տեղեկացա, որ կառույցն ընթացք է տվել ամիսներ առաջ իմ և ԱԺ նախագահ Ալեն Սիմոնյանի ուղարկած նամակին։
Սա միայն մեկն է այն հազարավոր գույքերից, որոնք մեր կարծիքով անկախացումից հետո դարձել են ՀՀ սեփականություն և ոչ իրավաչափ եղանակներով փոխանցվել տարբեր անհատների կամ կազմակերպությունների»,- գրել էր նախկին լրագրող Սիսակ Գաբրիելյանը։
Գրող, հրապարակախոս Մերուժան Տեր-Գուլանյանի խոսքով՝ իշխանությունների կողմից այս ամենը թիրախավորված բնույթ է կրում։
«Ժուռնալիստների միությունը բոլոր լրագրողների տունն է, որը հիմա իշխանությունն ուզում է խլել, որպեսզի լռեցնի նրանց խոսքը։
Անհասկանալի օրենքներ են հորինում, որպեսզի հասնեն իրենց ուզածին։ Ես նաև ցավում եմ, որ այս իշխանությունը դատի տվեց «Հրապարակ» թերթին։ Նույնիսկ Խորհրդային Միության ԿԳԲ-ի ժամանակ ես կարողացա ազատ խմբագիր լինել, «Գարունը» դարձրեցի 131 հազար տպաքանակով։ Նույնիսկ ԿԳԲ-ն ռիսկ չէր անում խոչընդոտել մեր աշխատանքը։ Այս ամսագիրը մտնում էր յուրաքանչյուրի տուն, այնտեղ տպագրվողը դառնում էր հայտնի մարդ։ Սա ասում եմ նրա համար, որ կարողանում էինք աշխատել ազատ, նույնիսկ Սոլժենիցին էի տպագրել, մեծ աղմուկ էր հանել։ Այն ժամանակ Կենտկոմի քարտուղարը Կարեն Դեմիճյանն էր, գնացի իր մոտ, ասացի՝ հեռացրեք ինձ, ձեր վրա խոսակցություններ չգան, նա չհեռացրեց ինձ, ու ես շարունակեցի հանգիստ աշխատել։ Բա հիմա ի՞նչ է նշանակում՝ հոդվածի համար մարդուն դատի տալ, խոսքի համար՝ բանտարկել»,– 168.am-ի հետ զրույցում նշեց Մերուժան Տեր-Գուլանյանը։
Նա հիշեցրեց Աստվածաշնչյան խոսքը՝ «Սկզբից էր բանը», այսինքն՝ խոսքը սկզբից էր։ Հիմա ՀՀ իշխանությունը դեմ է գնում ոչ միայն Աստծուն, այլև Աստվածաշնչի խոսքին։
«Ուղղակի դատապարտելի է իշխանությունների քայլը, ամբողջ կյանքս խմբագիր եմ աշխատել, լրագրող եմ եղել, հետևում եմ՝ այսօր ինչ է կատարվում, ինչպես են ճնշում լրատվամիջոցների խոսքը։ Թույլ տվեք մարդիկ խոսեն, գոնե խոսքին մի կպեք»,- հավելեց Մերուժան Տեր Գուլանյանը։
Ռազմական փորձագետ Դավիթ Ջամալյանը, ով սոցիալական ցանցերում չկա, սակայն մշտապես հետևում է Ժուռնալիստների միության նախագահ Սաթիկ Սեյրանյանի հաղորդումներին, վստահ է՝ իշխանությունը ցանկանում է պարզապես ազատ խոսքը լռեցնել։
«Եթե նախկին լրագրողները, ովքեր այսօր դարձել են իշխանավորներ և իրենց նախկին կոլեգաներին փորձում են հալածել, սա նշանակում է, որ այդ մարդկանց մոտ բարոյականության նշույլ չկա։ Երկրի ղեկավար կոչեցյալը նախկին լրագրող է, ով միաժամանակ եղել է նաև խմբագիր, խմբագիրներ են նաև Սաթիկ Սեյրանյանը, Արմինե Օհանյանը, նրանք նախկինում գործընկերներ են եղել, բայց գալով իշխանության՝ այդ անձը նախ դատի է տվել իր նախկին գործընկերոջը՝ Արմինե Օհանյանին, իսկ Սաթիկ Սեյրանյանի նախագահությամբ գործող միության շենքն ուզում է խլել, կարծում է՝ այդ ճանապարհով կկարողանա լռեցնել Սաթիկ Սեյրանյանին։ Ինձ համար այս մարդու պահվածքն արդեն զարմանալի չէ»,- 168.am-ի հետ զրույցում նշեց Դավիթ Ջամալյանը։
Ըստ մեր զրուցակցի, եթե այս իշխանությունը կարող է հետապնդել ու դավաճանել իր հետ նախկինում ճանապարհ անցած մարդկանց, ուրեմն՝ չպետք է զարմանալ, որ այդքան հեշտությամբ Արցախին դավաճանեց ու հանձնեց։
«Այս անձանց մոտ բարոյական տաբուներ չկան, և սա ամենավտանգավոր տեսակն է։
Սաթիկ Սեյրանյանը մեր ամենասկզբունքային լրագրողներից է, ում ղեկավարությամբ գործող լրատվամիջոցը մեր երկրում շատ հայտնի է։ Նա մեծ գործ է կատարում, թույլ չի տալիս, որպեսզի նիկոլական մանիպուլացնող ու մոլորեցնող քարոզչությունը մթագնի հանրության գիտակցությունը։ Հանրությանը սթափեցնող առաքելությունը կրողներից մեկն է նա։ Սա ամենամեծ վախն է այս իշխանությունների համար, քանի որ նրանք կարողանում են միայն էժանագին մանիպուլյացիաներով մոլորեցնել հանրությանը։
Իմ զորակցությունսժն եմ հայտնում Սաթիկ Սեյրանյանին, Արմինե Օհանյանին։ Եթե լրատվական դաշտը չկոնսոլիդացվի, ապա հերթով հասնելու են նաև մյուս լրատվամիջոցներին։ Ազատ խոսքը չպետք է լռեցվի, ու հանրությունը չդառնա նիկոլական մանիպուլյացիաների գերին»,- ընդգծեց Դավիթ Ջամալյանը։
