Խոստանում եմ ավելի մեծ վտանգ լինել իրենց համար այժմ, քան էի մինչև այսօր. Միքայել Աջապահյանի նամակը՝ մեկուսարանից
ԱԺ պատգամավորներ Գեղամ Մանուկյանն ու Անեսա Խամոյանն այցելել են ԱԱԾ մեկուսարանում գտնվող Միքայել Արքեպիսկոպոս Աջապահյանին:
Սրանց միջոցով Միքայել Արքեպիսկոպոս Աջապահյանը նամակ է հղել իր սիրելի հայրենակիցներին, սիրելի գյումրեցիներին: Նշենք, որ այսօր Գյումրիի օրն է:
«Սիրելիներ,
Այս չարիքի իշխանությունը՝ բաղկացած միջակություններից եւ բացարձակ ոչնչություններից եւ իրենց սպասարկող ողորմելի կամակատարներից, իր ավարտին հասցրեց հերթական անբարոյական սցենարը՝ իմ ապօրինի եւ շինծու դատապարտումով, ինչը անհամեմատելի է մեր հայրենի Արցախի կորստյան, հազարավոր զոհերի եւ անհետ կորածների ու գերիների առկայության հետ։
Սա կմնա այս չիշխանության ամոթն ու խայտառակությունը, թեեւ որքան թքես անամոթի երեսին, իր համար անձրեւ է թվալու։ Խոստանում եմ ավելի մեծ վտանգ լինել իրենց համար այժմ, քան էի մինչեւ այսօր։
Առայժմ այսքանը…
Սիրելի գյումրեցիներ, հարազատներ,
Շնորհավորում եմ մեր քաղաքի օրվա առիթով եւ շնորհակալ եմ զորակցության եւ սատարումի համար:
Մաղթում եմ, որ այսօր լավ ուրախանաք եւ ժպիտն անպակաս լինի ձեր գեղեցիկ դեմքերից: Այդ ժպիտը ավելացնել եմ փորձել վերջին 26 տարիներին եւ այսօր ձեր ցնծությունը լավագույն նվերը կլինի ինձ՝ բանտի պատերից ներս, որտեղ Աստված ինձ հետ է միշտ…
Օրհնությամբ՝ Միքայել Արքեպիսկոպոս Աջապահյան
04.10.25թ.
100-րդ օր իմ բանտարկության»:
