Թուրքիան թույլ չի տա Սիրիայի մասնատումը․ Էրդողան
Թուրքիայի նախագահ Ռեջեփ Թայիփ Էրդողանը չորեքշաբթի օրը հայտարարել է, որ Թուրքիան թույլ չի տա Սիրիայի մասնատումը կամ նրա տարածքային ամբողջականության խախտումը, եթե քրդերի գլխավորած «Սիրիական դեմոկրատական ուժերի» (ՍԴՈւ) և Սիրիայի կառավարության միջև ինտեգրման համաձայնագրի իրականացման դիվանագիտական ջանքերը ձախողվեն, հաղորդում է Reuters-ը։
«Մենք օգտագործել ենք բոլոր դիվանագիտական ուղիները՝ ինչպես Սիրիայի տարածքային ամբողջականությունը պահպանելու, այնպես էլ մեր սահմաններից դուրս ահաբեկչական ցանցի ձևավորումը կանխելու համար։ Մենք շարունակում ենք օգտագործել այս ուղիները համբերատարությամբ, անկեղծությամբ և առողջ բանականությամբ», – ասել է Էրդողանը խորհրդարանի աշխատանքների վերսկսմանը նվիրված միջոցառման ժամանակ։ «Եթե դիվանագիտական առաջարկները մնան անպատասխան, Թուրքիայի քաղաքականությունն ու դիրքորոշումը պարզ կլինեն։ Թուրքիան թույլ չի տա դեժավյուի կրկնություն Սիրիայում»։
Անկարան ՍԴՈւ-ն համարում է ահաբեկչական կազմակերպություն և զգուշացրել է ռազմական գործողությունների մասին, եթե այն չներառվի սիրիական պետական ապարատում՝ համաձայն Դամասկոսի հետ կնքված համաձայնագրի։
