Վրաստանի դատարանը սառեցրել է 7 ՀԿ-ների հաշիվները
Վրաստանի դատախազությունը հայտարարել է, որ 7 ՀԿ-ների բանկային հաշիվները սառեցվել են։ Այս մասին գրում է aliq.ge-ն։
Սառեցվել են Քաղաքացիական հասարակության հիմնադրամի, ISFED-ի, IDFI-ի, GDI-ի, «Ժողովրդավարության պաշտպաններ»-ի, «Սաֆարի»-ի և «Սոցիալական արդարադատության կենտրոն»-ի հաշիվները։
Դատախազությունը հայտարարել է, որ առգրավումը տեղի է ունեցել Վատո Շաքարիշվիլիի կազմակերպության դիմումի հիման վրա իրենց սկսած քրեական հետաքննության շրջանակներում, որը վերաբերում է «սաբոտաժին»։
Ըստ դատախազության՝ այս կազմակերպությունների հանցագործությունն այն է, որ նրանց «նպատակային միջոցները օգտագործվել են այնպիսի սարքավորումներ գնելու համար, ինչպիսիք են հատուկ գազային դիմակները, պաշտպանիչ ակնոցները, դիմակները, դեմքի ծածկոցները, պղպեղի սփրեյը և այլ միջոցներ, որոնք ակտիվորեն օգտագործել են ցուցարարները ոստիկանության հետ բռնի բախումների ժամանակ»։
ՀԿ-ներն արդեն արձագանքել են վերոնշյալ որոշմանը և հայտարարել, որ Թբիլիսիի քաղաքային դատարան հայց են ներկայացրել Հակակոռուպցիոն բյուրոյի դեմ: ՀԿ-ները պահանջում են անվավեր ճանաչել բյուրոյի ղեկավար Ռաժդեն Կուպրաշվիլիի մայիսի 31-ի հրամանը, որի հիման վրա իրենց դեմ հետաքննություն է ընթանում։
«Մենք մտադիր ենք օգտագործել մեր տրամադրության տակ եղած բոլոր իրավական լծակները՝ բռնաճնշողական օրենքներին դիմադրելու և մեր աշխատանքը շարունակելու հնարավորության համար, որը օգտակար կլինի վրաց ժողովրդին և պետությանը»,- նշել են նրանք։
