Ռուսաստանում կհայտնվի մետալուրգիական լոգիստիկ հանգույց՝ Թուրքիայի, Ադրբեջանի և Իրանի շուկաներ մուտք գործելու համար
ՌԴ-ում՝ Նիժնեկամսկում կհայտնվի լոգիստիկ նոր հանգույց, միաժամանակ կբացվի նաև արդյունաբերական պարկ։ Համապատասխան նախագիծը ներդրումային խորհրդում հավանության է արժանացրել Թաթարստանի Հանրապետության ղեկավար Ռուստամ Միննիխանովը։
«Հիմնական գաղափարը մետալուրգիական լոգիստիկ խոշոր հանգույցի ստեղծումն է, որը կլինի ամենամեծը Ռուսաստանում և երկրի հյուսիս-արևմուտքն ու հարավը կմիացնի Ուրալին: Նախատեսում ենք նաև դուրս գալ արտաքին շուկաներ՝ Իրան, Ադրբեջան, Թուրքիա։ Կունենանք 100 հազար քառակուսի մետր պահեստային տարածք: Արդեն պայմանագրեր են կնքվել մի շարք խոշոր ընկերությունների հետ»,- հայտարարել է «ТЭМПО»-ի տնօրենների խորհրդի նախագահ Ռուստեմ Շարիֆուլինը: Դրա մասին հայտնել է Татаринфо-ն։
