Ուինսթոն Չերչիլի առանձնատունը վաճառքի է հանվել 19,5 միլիոն ֆունտ ստեռլինգով

Մեծ Բրիտանիայի հանգուցյալ վարչապետ Ուինսթոն Չերչիլի առանձնատունը վաճառվում է 19,5 միլիոն ֆունտ ստեռլինգով (մոտ 25,2 միլիոն դոլար), գրում է Robb Report-ը։

Չերչիլը երկու անգամ զբաղեցրել է Մեծ Բրիտանիայի վարչապետի պաշտոնը՝ սկզբում 1940-1945 թվականներին՝ Երկրորդ համաշխարհային պատերազմի ժամանակ, իսկ հետո՝ 1951-1955 թվականներին։ 1945 թվականին ընտրություններում պարտվելուց հետո Չերչիլը մոտ 310,000 ԱՄՆ դոլարով գնեց 27 Hyde Park Gate-ը՝ որպես գրասենյակ օգտագործելու համար:

Վայրն իդեալական էր՝ իրեն արդեն պատկանող քաղաքային տան կողքին, եւ նա շուտով միավորեց այդ երկու տները մեկ հսկա առանձնատան մեջ:

Այնուամենայնիվ, 1965 թվականին նրա մահից հետո, II աստիճանի ցուցակագրված վայրը, որը Բուքինգհեմյան պալատից ընդամենը երկու մղոն դեպի արեւմուտք էր, կրկին բաժանվեց առանձին կացարանների: «Լինելով սըր Ուինսթոն Չերչիլի սիրելի տունը բրիտանական պատմության առանցքային դարաշրջանում՝ այս տունը հպարտ ժառանգություն ունի»,- «Mansion Global»-ին ասել է Knight Frank-ի վաճառքի բաժնի ղեկավար Ջեյմս Փեյսը:

Նրբագեղ կացարանը ներկայումս բաղկացած է չորս հարկերի վրա գտնվող վեց ննջասենյակներից: Կա նաեւ մասնավոր պատշգամբ եւ բավականին մեծ այգի:

Առաջին հարկում կա տպավորիչ հյուրասենյակ, ինչպես նաեւ՝ գրադարան։ Չերչիլի օրոք այս հարկում գտնվում էր նրա ննջասենյակը, որտեղ նա, ըստ տեղեկությունների, ապաքինվել էր ոտքի կոտրվածքից, երբ իր արձակուրդն էր անցկացնում Մոնտե Կառլոյում:

Ներքեւում գտնվում է բավականին ժամանակակից խոհանոց, ինչպես նաեւ նախաճաշի սենյակ եւ պաշտոնական ճաշասենյակ, լոգարան:

Տունն այժմ ունի նաեւ մարզասրահ։ Զվարճալի փաստ՝ ըստ English Heritage-ի՝ Չերչիլը մոտակա Հայդ պարկի 28 հասցեում գտնվող մեկ սենյակը վերածել էր գրադարանի՝ լցված բարակ գրքերի հավաքածուով եւ իր նախնիների դիմանկարներով։