ԱԺ-ն ընդունեց «Ոստիկանության գվարդիայի մասին» օրենքը
2025 թվականից Հայաստանում կունենանք ոստիկանական գվարդիա։ Այսօր Ազգային ժողովը 65 կողմ, 28 դեմ ձայներով երկրորդ ընթերցմամբ և ամբողջությամբ ընդունեց ներկայացված օրինագիծը։
Նախատեսվում է, որ գվարդիան կձևավորվի 2025 թվականի նոյեմբերի 1-ին։
Նշենք, որ ոստիկանական գվարդիայի ստեղծումն արևմտյան ստանդարտներով բարեփոխումների մի մասն է, ըստ որի՝ պարեկապահակային և ճանապարհային ոստիկանությունը միավորվել են, իսկ ոստիկանությունը բաժանվել է պարեկային (ընդհանուր օրենքի և կարգի պաշտպանության համար), քրեական (կազմակերպված հանցավորության դեմ պայքարի համար), ինչպես նաև ոստիկանության գվարդիայի: Այնուհետև նախատեսվում է ստեղծել նաև համայնքային ոստիկանության բաժին (տեղամասային ոստիկանության փոխարեն)։
Նոր սպառազինությամբ ու վերապատրաստված անձնակազմով ոստիկանության կառուցվածքային ստորաբաժանմանը կվերապահվեն հասարակական կարգի պահպանության և հասարակական անվտանգության ապահովման, պետական շենքերի և կարևորագույն օբյեկտների պահպանության, պետական արարողակարգով նախատեսված պատվիրակությունների ուղեկցման, ինչպես նաև ռազմական և արտակարգ դրության իրավական ռեժիմի ապահովման ու այլ գործառույթներ: Այսինքն՝ ռազմական դրության կամ պատերազմի ժամանակ ոստիկանության զորքերը այլևս պետական սահմանի պաշտպանություն չեն իրականացնի։
Հիշեցնենք, որ օրինագծի քննարկումը բավական բուռն էր ընթանում։ Ավելի վաղ օրենքը ենթադրում էր, որ ռազմական դրության ռեժիմի դեպքում վարչապետը (որպես գերագույն գլխավոր հրամանատար) կկարողանա ոստիկանական գվարդիային ռազմական հանձնարարություններ տալ։ Քննարկումներից հետո հանվեց վարչապետի հատուկ հանձնարարությունների մասին սկանդալային դրույթը։
Ոստիկանության գվարդիան կունենա անմիջական ենթակայության տարածքային ստորաբաժանումներ առնվազն ՀՀ երեք մարզում (Լոռի, Շիրակ, Սյունիք, որոնք անհրաժեշտության դեպքում կսպասարկեն նաև հարակից մարզերը), ինչպես նաև պետական պահպանության և քրեական վարույթին ներգրավված անձանց պաշտպանության ստորաբաժանումներ (Երևանում և մարզերում):
