ՆԳ նախարարը հանձնարարել է ակտիվացնել աշխատանքները հանցագործությունների բացահայտման ուղղությամբ
Տեղի է ունեցել Ներքին գործերի նախարարության ոստիկանության ծառայությունների և տարածքային մարմինների 2023 թվականի առաջին կիսամյակի օպերատիվ-ծառայողական գործունեության արդյունքների ամփոփմանը նվիրված խորհրդակցություն, որը վարել են ՆԳ նախարար Վահե Ղազարյանն ու ՆԳՆ ոստիկանության պետ-ներքին գործերի նախարարի տեղակալ Արամ Հովհաննիսյանը։
Ինչպես հայտնում են նախարարությունից՝ խորհրդակցությանը մասնակցել են ոստիկանության պետի տեղակալները, կոլեգիայի անդամները, կենտրոնական ապարատի ստորաբաժանումների, ծառայությունների, Երևանի և մարզային վարչությունների, տարածքային բաժինների պետերը։
Նշվել է, որ 2023 թվականի առաջին կիսամյակում ՆԳՆ ոստիկանությունը կատարել է իր առջև դրված խնդիրները. ձեռնարկված միջոցառումների շնորհիվ վերահսկվել է օպերատիվ իրավիճակը, պահպանվել է կայուն հասարակական կարգն ու անվտանգությունը:
Ներկայացվել են հաշվետու ժամանակահատվածում օպերատիվ-ծառայողական գործունեության արդյունքները, ինչպես նաև հանցավորության դինամիկայի միտումները, հանցավորության շարժընթացի մանրամասներ։
Ամփոփվել են 2023 թվականի առաջին կիսամյակում առանձին ծառայությունների գործունեության արդյունքները և կատարված աշխատանքներով գրանցված ցուցանիշները։
ՆԳ նախարար Վահե Ղազարյանը անդրադարձ է կատարել հասարակական կարգի պահպանության և հասարարական անվտանգության ապահովման ուղղությամբ իրականացված աշխատանքներին, վեր հանել առկա խնդիրներն ու բացթողումները՝ դրանք վերացնելու ուղղությամբ տալով հստակ հանձնարարականներ։
ՆԳ նախարարը հանձնարարել է ակտիվացնել աշխատանքները սպանությունների, սպանության փորձերի, խարդախությունների, գողությունների և այլ հանցագործությունների բացահայտման ուղղությամբ։
ՆԳՆ ոստիկանության պետ Արամ Հովհաննիսյանն էլ ընդգծե է, որ չի կարելի բավարարվել գրանցված արդյունքներով, և անհրաժեշտ է ողջ ներուժը կենտրոնացնել հանցավորության դեմ պայքարի արդյունավետությունն ավելի բարձրացնելու վրա։
Քննարկվել են առանձին հանցատեսակների դեմ պայքարի մեխանիզմները, տրվել են կոնկրետ ցուցումներ ու հանձնարարականներ։
