«Մեզ մոտ հարաբերական հանգիստ է, հազվադեպ կրակոցներ լինում են, սակայն անպատասխան չեն մնում». Արենիի համայնքապետ
Ադրբեջանական կողմը հերթական միջադեպն է հրահրել հայ-ադրբեջանական սահմանի Երասխի հատվածում։
Ըստ Պաշտպանության նախարարության տարածած հաղորդագրության, հուլիսի 19-ի երեկոյան և 20-ի գիշերը, մինչև ժամը 02։00-ն, ադրբեջանական զինված ուժերը շարունակել են հրաձգային զինատեսակներից, առանց ականանետերի կիրառման, գնդակոծել հայ-ադրբեջանական սահմանի Երասխի հատվածում տեղակայված հայկական դիրքերը:
Մի քանի ժամ տևած ինտենսիվ փոխհրաձգության հետևանքով հայկական կողմից հրազենային վիրավորում է ստացել Երասխ համայնքի ղեկավար Ռադիկ Օղիկյանը, ով այդ պահին կազմակերպում էր ադրբեջանցիների գործողությունների արդյունքում տեղանքում բռնկված հրդեհը մարելու աշխատանքները։
168.am-ը Արենի համայնքի ղեկավար Հուսիկ Սահակյանից հետաքրքրվեց, թե համայնքում իրավիճակն ինչպե՞ս է։
«Մեզ մոտ հարաբերական հանգիստ է։ Այստեղ հազվադեպ կրակոցներ լինում են, սակայն անպատասխան չեն մնում»,- նշեց Հուսիկ Սահակյանը։
Թե ի՞նչ մտահոգություններ ունի Արենիի անվտանգության առնչությամբ՝ հարցին, Հուսիկ Սահակյանը դժվարացավ պատասխանել, նշելով, որ ճիշտ կլինի՝ այդ հարցին պատասխանեն զինվորականները։
«Բնակիչների մոտ որևէ խուճապ չկա, գյուղացիներն իրենց առօրյա հոգսերով ու աշխատանքներով են զբաղվում, նման բան մեզ մոտ չկա»,- եզրափակեց Հուսիկ Սահակյանը։
