«Բացահայտ հայտարարում եմ՝ ինձ վրա ոչ ոք, ոչ մի տիպի ճնշում չի գործադրել… որևէ մեկը որևէ տիպի հրահանգ չի տվել». Ոստիկանության Ապարանի բաժնի պետ
![](https://168.am/wp-content/uploads/2020/12/249845.jpg)
«Բացահայտ հայտարարում եմ՝ ինձ վրա ոչ ոք, ոչ մի տիպի ճնշում չի գործադրել… որևէ մեկը որևէ տիպի հրահանգ չի տվել». Ոստիկանության Ապարանի բաժնի պետ ԼՈՒՐԵՐ.com-ի տեղեկություններով ՝ Ապարան համայնքի ոստիկանության բաժնի պետ Արմեն Հարությունյանին փորձում են անօրինական կերպով աշխատանքից հեռացնել։ Ըստ կայքի՝ վերջինին հրահանգ է իջեցվել արգելել համայնքապետերին մասնակցել ցույցերին և ընդդիմադիրներին աջակցություն ցուցաբերել։ Արմեն Հարությունյանը հրաժարվել է կատարել ապօրինի հրահանգը, ինչի պատճառով փորձում են նրան ստիպել աշխատանքից ազատման դիմում գրել, սակայն ոստիկանության գնդապետը հրաժարվում է ազատման դիմում գրել։
168.am-ի հետ զրույցում Արմեն Հարությունյանը նախ խորհուրդ տվեց դիմել ոստիկանության լրատվական ծառայություն, սակայն, այնուամենայնիվ, պատասխանեց մեր հարցերին՝ կտրականապես հերքելով շրջանառվող տեղեկությունը: «Ես օրինակելի ծառայող եմ, պաշտպանում եմ իմ ոստիկանության շահերը, առաջնորդվում եմ բացառապես Սահմանադրությամբ, Քրեական, Քրեական դատավարության և Ոստիկանության մասին օրենքներով: Բացահայտ հայտարարում եմ՝ ինձ վրա ոչ ոք, ոչ մի տիպի ճնշում չի գործադրել, ոչ ոք ինձ չի ասել՝ աշխատանքից ազատման զեկուցագիր գրիր»,- ասաց ոստիկանության Ապարանի բաժնի պետը:
Վերջինը նշեց նաև, որ ինքը ծառայում է Հայաստանի Հանրապետությանը, և սրանք ամպագոռգոռ բառեր չեն: «Ես 27 տարի աշխատում եմ ոստիկանությունում, բարեխիղճ օրենքին եմ ծառայում ոստիկանության շարքերում, և երբ քարտով իմ ընտանիքի կարիքները հոգալու համար գումար եմ ստանում, ես ստանում եմ ոստիկանության գումարը»,- ասաց Արմեն Հարությունյանը՝ հավելելով, որ խիստ զայրացած է նշված հրապարակումից:
Ըստ ոստիկանության գնդապետի՝ օրենքից դուրս որևէ քայլ անելու համար ոստիկանության ծառայողն առնվազն սրիկա դավաճան պետք է լինի:
«Ուզում եմ շեշտել նաև, որ ինձ որևէ մեկը որևէ տիպի հրահանգ չի տվել: Ես ինքս Երևանի Կենտրոնի բնակիչ եմ, ծառայում եմ Ապարանում ու պետք է ասեմ, որ այստեղ ամեն ինչ նորմալ է, քաղաքական իրավիճակը՝ հանգիստ, և առհասարակ ապարանցիները շատ կարգապահ ու հանգիստ ժողովուրդ են, իրենց հոգսերի տակ կքած ու ամենօրյա խնդիրներ լուծող»,- նկատեց Արմեն Հարությունյանը: