«Վերջին 2 տարում կրճատվել է մարտավարական օղակը. այդ զորամասերի մի մասը պիտի կանգնեցներ հակառակորդի մխրճումը». Մովսես Հակոբյան
ԶՈւ կատարելագործման կամ օպտիմալացման պլանը ենթարկվել է փոփոխության: Մասնավորապես, մարտավարական օղակը կրճատվել է, օպերատիվ օղակը` ավելացել, մինչդեռ նախատեսված էր ճիշտ հակառակը:
Լրագրողների հետ հանդիպմանն ասաց ՀՀ ՊՆ ռազմական վերահսկողական ծառայության և ԳՇ նախկին պետ Մովսես Հակոբյանը՝ հավելելով, որ ԳՇ-ի և ՊՆ-ի անձնակազմի թվաքանակը 95 տոկոսով ավելացել է։ Այսինքն, վերջին երկու տարում, այսպես ասած, կռվողների թիվը կրճատվել է, թուղթ գրողներինը՝ ավելացել:
«Հրամանը շատ վատն է՝ 00038, հույժ գաղտնի հրաման է եղել: Կրճատվել է մարտավարական օղակը՝ սկսած վաշտից, ավարտված գնդերով: Կրճատվել է 5 գունդ, որտեղ կար ամբողջ սպայական կազմը՝ հրետանիով, կապի միջոցներով, ամեն ինչով, բացի զինվորներից։ Եվ այդ զորամասերը պատերազմի ժամանակ պետք է լրահամալրվեին, ներդաշնակվեին և փոխարինեին այն զորամասերին, որտեղ մի մասը 2-րդ էշելոնում խնդիր ունեին: Մի մասն ուներ հանկարծակի ստացվող խնդիրներ. եթե հակառակորդն ուրիշ տեղով է մխրճվել, այդ մխրճումները փակելու և կանգնեցնելու: Դրանից զատ, բոլոր պաշտպանական շրջաններում Արցախի, որ պիտի ձևավորվեին ևս մեկ գումարտակ, կրճատվել է: Դրանից ներքև կրճատվել է նաև մեկ վաշտ, բայց հետո իմ պնդմամբ վեր են ածել դասակների՝ մի-մի դասակ է կրճատվել բոլոր վաշտերում»,- մանրամասնեց Մովսես Հակոբյանը:
