Թագուհի Թովմասյանը «Ռոստելեկոմի» հետ միասին խրախուսական գումարներ բաժանեց բուժաշխատողներին
Պատգամավոր Թովմասյանը Հայաստանի հեռահաղորդակցության ոլորտի առաջատար օպերատորներից մեկի` «Ռոստելեկոմի» հետ միասին Գեղարքունիքի մարզկենտրոն Գավառի պոլիկլինիկայի աշխատակիցներին պարգևավճարներ բաժանեցին:
8 տասնյակից ավել աշխատակիցներ Թագուհի Թովմասյանի առաջարկությամբ եւ Ռոստելեկոմ Հայաստան ընկերության գլխավոր տնօրեն Հայկ Ֆարամազյանի օգնությամբ խրախուսվեցին: Վարորդից մինչեւ տնօրեն, բժիշկից մինչեւ բուժակ ու մաքրուհի, ստացան խրախուսական գումարներ եւ ԱԺ պատգամավոր Թագուհի Թովմասյանը հայտարարեց, որ ինչ էլ անեն` քիչ է լինելու բժիշկների համար:
«Դուք այսօր մեր սահմանապահ զինվորների նման վտանգավոր ճակատում եք ու մարտնչում եք չերեւացող վարակի դեմ: Ուզում եմ պինդ մնաք, առողջ մնաք, որ կարողանաք առողջացնել մեր հայրենակիցներին: Ես խոնարհվում եմ բոլորիդ առաջ»,- հայտարարեց պատգամավոր Թագուհի Թովմասյանը:
Նա հույս հայտնեց, որ մարզում նմանօրինակ ակցիաները շարունակական կլինեն եւ հնարավորություն կլինի առաջիկայում այլ բնակավայրերի բուժաշխատողներին եւս խրախուսական գումարներ բաժանել:
