«Ես չեմ հավատում, որ Ռուսաստանը կմասնակցի նման վատ սցենարների». Էրդողան
Թուրքիայի նախագահ Թայիփ Էրդողանը փետրվարի 19-ին հայտարարել է, թե չի հավատում Սիրիայում վատ սցենարին Ռուսաստանի մասնակցությանը, որպիսին ՌԴ նախագահի մամուլի քարտուղար Դմիտրի Պեսկովը համարել է Թուրքիայի հնարավոր ռազմական գործողությունը սիրիական Իդլիբում, տեղեկացնում է ՌԻԱ Նովոստիին:
«Ես չեմ հավատում, որ Ռուսաստանը կմասնակցի նման վատ սցենարների»,- ասել է Էրդողանը՝ լրագրողների խնդրանքով մեկնաբանելով վատ սցենարի վերաբերյալ Կրեմլի արած հայտարարությունը: Փետրվարի 19-ին ավելի վաղ ՌԴ նախագահի մամուլի քարտուղար Դմիտրի Պեսկովը հայտարարել է, որ վատագույն սցենարը կլինի, եթե Թուրքիայի նախագահ Թայիփ Էրդողանը Սիրիայի տարածքում ռազմական գործողություն սկսի սիրիական բանակի դեմ: «Եթե խոսքը վերաբերում է Սիրիայի Հանրապետության օրինական իշխանությունների, Սիրիայի զինված ուժերի դեմ գործողություններին, ապա դա իրադարձությունների զարգացման վատագույն տարբերակն է»,-հավելել է Պեսկովը:
Մինչ այդ Էրդողանը հայտարարել է, որ Սիրիայի Իդլիբ քաղաքում հանրապետության զինված ուժերի նոր ռազմական գործողությունը սոսկ ժամանակի հարց է: «Թուրքիան ավարտել է պատրաստությունը, որպեսզի իրագործի Իդլիբին վերաբերող իր պլանները, ինչպես մենք դա անում էինք նախորդ գործողությունների ժամանակ:
Անկեղծ ասած, Իդլիբում գործողությունը սոսկ ժամանակի հարց է: Թուրքիան Իդլիբը չի թողնի ռեժիմի (Սիրիայի նախագահ Բաշար Ասադի) կամայականությանը»,-ասել է Թուրքիայի ղեկավարը: Էրդողանի խոսքով՝ «չնայած Իդլիբի շուրջ բանակցությունների շարունակմանը, Թուրքիան եւ ՌԴ-ն «դեռեւս հեռու են այդ թեմայի շուրջ համաձայնության հասնելուց»: Նա նաեւ նշել է, որ Անկարայում եւ Մոսկվայում կայացած բանակցություններն «առայժմ «ցանկալի արդյունք չեն տվել»:
