Խոշոր ավտովթար Երևանում. վիրավորներին ավտոմեքենայից դուրս է բերել բժշկական համալսարանի ռեկտոր Արմեն Մուրադյանը
Հունվարի 9-ին, ժամը 21:42-ին «911» ծառայությանը տեղեկություն է հաղորդվել, որ Երևան քաղաքի Հերացի-Շարիմանյան փողոցների խաչմերուկում տեղի է ունեցել ՃՏՊ. կա արգելափակված քաղաքացի. անհրաժեշտ է փրկարարների օգնությունը:
Դեպքի վայր են մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ և ԱԻՆ ՓԾ հատուկ նշանակության փրկարարական աշխատանքների իրականացման կենտրոնի փրկարարական ջոկատը:
Պարզվել է, որ բախվել են «Honda Fit» մակնիշի, ճամփեզրին կայանած «Mercedes C» մակնիշի և «Nissan Primera» մակնիշի ավտոմեքենաները, ինչի հետևանքով «Honda Fit» մակնիշի ուղևորը արգելափակվել է ավտոմեքենայում։
Փրկարարները «Honda Fit» մակնիշի ավտոմեքենայից դուրս են բերել ուղևոր Ա. Գ.-ին (ծնված 1989 թ․), ով տարբեր աստիճանի մարմնական վնասվածքներով հոսպիտալացվել է «Հերացի» թիվ 1 հիվանդանոցային համալիր: Բժիշկները տուժածի առողջական վիճակը գնահատել են միջին ծանրության։
Փրկարարները փակել են «Honda Fit» մակնիշի ավտոմեքենայի գազի բալոնի փականը և հոսանքազրկել ավտոմեքենան։
Գագիկ Շամշյանի տեղեկություններով՝ վիրավորներին ավտոմեքենայից դուրս են բերել Երևանի բժշկական համալսարանի ռեկտոր Արմեն Մուրադյանն ու հրշեջ-փրկարարները և մինչ հիվանդանոց տեղափոխելը, Ա. Մուրադյանը բժիշկների հետ տեղում առաջին բուժօգնությունն է ցուցաբերել վիրավորներին:
