Առաջատարի դիրքը պահպանելու համար. Հայաստանը ուժերը կչափի Չեռնոգորիայի հետ
Սեպտեմբերի 28-ին Հայաստանի ֆուտբոլի ազգային հավաքականը Ազգերի լիգայի C լիգայի երկրորդ տուրում Երևանի Վազգեն Սարգսյանի անվան «Հանրապետական» մարզադաշտում կընդունի Չեռնոգորիայի ընտրանուն։ Հանդիպումը կմեկնարկի ժամը 20:00-ին։
Հայաստանի հավաքականը մրցաշարը մեկնարկել է հաղթանակով՝ առաջին տուրում 2:0 հաշվով առավելության հասնելով Լատվիայի նկատմամբ։ Գոլերի հեղինակներ դարձան Գևորգ Հարությունյանն ու Արթուր Ղարիբյանը։ Դրանից առաջ Եղիշե Մելիքյանի գլխավորած թիմը երկու ընկերական խաղ էր անցկացրել՝ նույն՝ 1:1 հաշվով ոչ-ոքի ավարտելով հանդիպումները Ղազախստանի և Մոլդովայի դեմ։
Չեռնոգորիան ևս հաղթանակով է սկսել Ազգերի լիգայի նոր խաղարկությունը։ «Համարձակ բազեները» առաջին տուրում 2:1 հաշվով հաղթել են Կիպրոսին՝ հանդիպման ընթացքում պարտվելով, սակայն կարողանալով փոխել խաղի ընթացքը։ Մինչ այդ Չեռնոգորիայի հավաքականը ընկերական խաղերում հաղթել էր Բուլղարիային և Անդորրային, 2:2 հաշվով ոչ-ոքի խաղացել Սլովենիայի հետ, իսկ Սլովակիային զիջել էր 2:3 հաշվով։
Նախախաղային ասուլիսում Հայաստանի հավաքականի պաշտպան Նաիր Տիկնիզյանը Չեռնոգորիան անվանել է խմբի և առաջիկա հանդիպման ֆավորիտ, սակայն ընդգծել է, որ Հայաստանի ընտրանին սեփական հարկի տակ հեշտ մրցակից չի լինելու։
«Մենք գիտենք նրանց ուժեղ ու թույլ կողմերը, սակայն մեր մրցակիցներն էլ պիտի գիտակցեն, որ խաղում ենք տանը, մեր երկրպագուների աջակցության ներքո, և իրենց հեշտ հանդիպում չի սպասվում»,- ասել է Տիկնիզյանը։
Հայաստանի հավաքականի գլխավոր մարզիչ Եղիշե Մելիքյանն էլ Չեռնոգորիայի դեմ խաղը կարևորել է ամբողջ մրցաշարի համատեքստում։
«Չեռնոգորիայի դեմ հանդիպումը անասելի կարևոր խաղ է մեզ համար։ Եթե մենք ուզում ենք մնալ առաջատարի դիրքում, իսկ մենք դա ուզում ենք, ապա գալիք խաղը շատ դժվար է լինելու։ Մեր ցանկությունը շատ մեծ է հաղթանակի հասնելու համար։ Կարևոր է նաև, որ չպարտվենք այս թիմին»,- նշել է Մելիքյանը։
Մարզիչը նաև ընդգծել է պաշտպանությունում կարգապահ խաղի և սեփական դարպասն անառիկ պահելու կարևորությունը։ Նրա խոսքով՝ հավաքականը շարունակում է խնդիրներ ունենալ վնասվածք ստացած ֆուտբոլիստների պատճառով, իսկ Խուլիո Բուենոն մոտ երեք խաղ բաց կթողնի։
Երկու հավաքականներն էլ առաջին տուրից հետո ունեն երեքական միավոր, ուստի Երևանի հանդիպումը կարող է էական նշանակություն ունենալ խմբի առաջատար դիրքերի համար։ Հայաստանի թիմը կփորձի շարունակել հաղթական մեկնարկը և սեփական հարկի տակ հերթական կարևոր միավորները վաստակել։
