«Փաշինյանը մեզ ասաց՝ «դե, կարողանում ենք՝ չե՞նք բերում, Ադրբեջանն էլ իր գերիներին է ուզում». 6 տարի է՝ մեզ խաբում են». Անհետ կորած զինծառայողի մայր
Արդեն 6-րդ տարին է՝ 2020 թվականի Արցախի 44-օրյա պատերազմում անհետ կորած զինծառայողների ծնողները փորձում են պատկան մարմիններից որևէ տեղեկություն ստանալ իրենց տղաների գտնվելու վայրի վերաբերյալ։ Այս տարիների ընթացքում նրանք թակել են պետական բոլոր մարմինների դռները, հանդիպել Նիկոլ Փաշինյանի հետ, սակայն ապարդյուն։
«Քիմիկների զորամասի» անհետ կորած զինծառայողներից մեկի մայրը՝ Հռիփսիմե Հակոբյանը, 2020 թվականից պայքարի մեջ է, ասում է՝ թոռները մեծանում են, իրենց հայրիկին են ուզում, չգիտի՝ նրանց ինչ պատասխան տա։
«Երկու ամիս առաջ մենք հանդիպել ենք Նիկոլ Փաշինյանի հետ, դա մեր վերջին հանդիպումն է եղել։ Հանդիպումից հետո մեզ ասացին, թե մեր բոլոր հարցերի պատասխանները գրավոր կուղարկեն, ուղարկեցին՝ բայց շատ վատ ձևով։ Այս պատասխանի մեջ մեր հասցեին մեղադրանք կար, նշել էին, թե իբր մենք հրաժարվել ենք ԴՆԹ հանձնելուց։ Իրենք շատ սխալվում են, պատասխանը ստանալուց անմիջապես հետո զանգահարել եմ Գագիկ Իսախանյանին՝ Նիկոլ Փաշինյանի օգնականին, հերքել եմ իրենց պատասխանը, որովհետև «Քիմիկների զորամասից» անմիջապես գնացել ու ԴՆԹ անալիզ են հանձնել 2020 թվականին։
Այսինքն՝ ի՞նչ է նշանակում այս ամենը, մարմիններ կան, ուզում են մենք գնանք ԴՆԹ անալիզ հանձնենք ու այդ մարմինները մե՞զ տան։ Իրենց ասել եմ, որ ունեմ բռնի անհետացման փաստեր, ինչի՞ համար գնամ հավելյալ ԴՆԹ անալիզ հանձնեմ, նախկինում տվել ենք, այն էլ՝ 2 անգամ»,- 168.am–ի հետ զրույցում ասաց Հռիփսիմե Հակոբյանը։
Նա տարակուսած է, ասում է՝ արդեն չգիտի՝ ո՞ւր գնալ, ո՞ւմ դիմել, քանի որ պատկան մարմիններն անարդյունավետ են աշխատում, հատկապես այն դեպքում, երբ բոլորին ասել է, որ տեղյակ են՝«Քիմիկների զորամասի» զինծառայողների հարազատները հենց առաջին օրվանից ԴՆԹ են հանձնել։
«Պատկան մարմինները ծնողներից որին մասունք տվեցին, որին՝ մի ոսկոր, այն էլ՝ 3 մասի բաժանված, պատկերացնո՞ւմ եք այդ ծնողների վիճակը, այսինքն՝ շատ լինի, քիչ չլինի։ Շատ վատ աշխատանք էին կատարել այն ժամանակ, նույնն էլ հիմա են անում։ Ես սպասում եմ Գագիկ Իսախանյանի պատասխանին, եթե ոչ՝ առաջիկայում նորից զանգահարելու եմ, այդ թվում՝ բոլոր ծնողները։
Գիտե՞ք՝ հիմա ինչ վիճակում ենք մենք՝ մեզ դրել «քոռ դանակով» մորթում են ու չեն կարողանում սպանել։ Մենք հիմա դիահերձարաններում ունենք տղաների մարմիններ, բայց դրանք արդյո՞ք մեր տղաների մարմիններն են։ Հիմա եթե ես ունեմ տեսանյութեր, որտեղ իմ տղան ողջ է եղել, գնամ այդ մարմիններն ի՞նչ վերցնեմ, ես Նիկոլ Փաշինյանին էլ եմ ասել, որ այդ տեսանյութերն օդից չեն ընկել, նույնիսկ ռուսական «Առաջին ալիքն» է ցուցադրել, թե ինչպես են մեր տղաներին գերեվարում։ Այդ ամենը, նույնն ադրբեջանցիներն էին տարածել»,- հավելեց Հռիփսիմե Հակոբյանը։
Ասում է՝ չի հասկանում պատկան մարմինների տրամաբանությունը, նրանց տրամաբանությամբ՝ պետք է պարզապես գնան ու մեկի մարմինը վերցնե՞ն, գերեզմանո՞ց սարքեն, այն դեպքում, երբ գիտի, որ իր տղան ադրբեջանական գերության մեջ է։
«Ես միշտ ասել եմ, որ այս ամենի հետևում կանգնած է Նիկոլ Փաշինյանը, առանց իրեն՝ այս գործը չի բացվելու։ Մեզ ուր էլ տանեն, մենք կրկին գալու ենք հանդիպենք նրան, ինչ էլ անում են՝ ի գիտություն իրեն են անում։ Նախկինում ԱԱԾ նախկին ղեկավար Արմեն Աբազյանն ասում էր՝ «հես ա բացահայտելու ենք», եթե Փաշինյանը տեղյակ էր լինում՝ «հես-ա»-ն լինում էր, եթե չէ՝ տեսաք էլի, բան էլ չարեցին։
Այն ժամանակ գոնե Արմեն Աբազյանն ինչ-որ բան անում էր, մեր հետ հանդիպելուց ասում էր, որ մինչև վերջ մեզ հետ է, բայց Նիկոլ Փաշինյանը տեսավ, որ նա ինչ-որ քայլեր է ձեռնարկում ու պիտի հասնի նրան, որ բացահայտումներ լինեն, Աբազյանին հանեց գործից։ Աբազյանին փոխարինեց մեկով, որը ոչինչ չի անի, որը մեր գործերից նորմալ տեղյակ էլ չէ, ասում է՝ «ձեզ կանչեմ՝ ի՞նչ ասեմ, երբ ես ոչինչ չգիտեմ»: Եթե ոչինչ չգիտես, ինչո՞ւ ես նստել այդտեղ, չգիտե՞ս, որ այդ աթոռին նստողը պետք է կարողանա ծնողներին պատասխան տալ։ Մեզ շատ են զզվեցրել ու հոգնեցրել, բայց այստեղ խոսքը իմ երեխուն է վերաբերում, չես կարողանում հիասթափվել։ Իրենց քաղաքական խաղերն են, որից մենք զզվել ենք արդեն»,- շեշտեց մեր զրուցակիցը։
Խոսելով «Քիմիկների զորամաս» անվանումը ստացած քրեական գործով դատական նիստերի մասին, Հռիփսիմե Հակոբյանն ասաց, որ նիստերից մեկի ժամանակ դատավորին հարցրել է՝ ինչո՞ւ է այդքան երկարում դատական գործընթացը, պատճառը ո՞րն է, դատավորը պատասխանել է, որ ծնողները պետք է ինչ-որ հարցեր ի հայտ բերեն։
«Չգիտեմ, երևի տանում են նրան, որ ես ինքս իմ վրեժը լուծեմ։ Շատ վատ են աշխատում, մեր խնդրի հետ կապված որևէ լավ բան չկա, երբ տեսնում են, որ որևէ մեկն էլ լավ է աշխատում՝ անմիջապես աշխատանքից հեռացնում են։ Նիկոլ Փաշինյանին հիշեցրի, որ ասում էր՝ տղաները 2 ամիս էլ կդիմանան Բաքվի բանտում, բայց իր ասածից հետո արդեն մոտ 5 տարի է անցել, պատասխանում է՝ «դե կարողանում ենք՝ չե՞նք բերում, Ադրբեջանն էլ իր գերիներին է ուզում»։
Ասել եմ, բա ունեինք մարդասպանության համար Հայաստանում բռնված երկու ադրբեջանցի, ինչո՞ւ բաց թողեցիք, գոնե փոխանակեիք, ասում է՝ մենք մարդասիրական ձևով ենք հետ վերադարձրել։ Այսինքն՝ իրենք Ադրբեջանի համար մարդասեր լինեն, Ադրբեջանը մեզ համար՝ չէ, այդ ինչ էր ասում։ Մեր երեխեքի համար բան չեն անում, մեզ 6 տարի խաբելով հասցրել են այստեղ»,- ընդգծեց Հռիփսիմե Հակոբյանը։
