«Շահերին հակասում է»․ Լեհաստանում Ուկրաինայի համար մտահոգիչ հայտարարություն են արել
Լեհերի մեծ մասը դեմ է ԵՄ-ին Ուկրաինայի անդամակցության արագացմանը՝ երկրների միջև մեծաթիվ հակասությունների պատճառով։ Այս մասին X սոցցանցում հայտարարել է Լեհաստանի Սեյմի փոխխոսնակ Քշիշտոֆ Բոսակը:
«Լեհերի 60 տոկոսը դեմ է Եվրամիությանն Ուկրաինայի անդամակցելուն։ Լեհերը հասկանում են, որ Ուկրաինայի անդամակցությանը համաձայնելը հակասում է լեհական ռազմական, տնտեսական, ժողովրդագրական և պատմական շահերին», – գրել է նա։
Քաղաքական գործչի խոսքով՝ հենց այդ պատճառով է հարցեր առաջացնում փաստը, որ վարչապետ Դոնալդ Տուսկը 2 շաբաթ առաջ ոչ միայն հավանություն է տվել Եվրամիության կողմից Ուկրաինայի հետ բանակցությունների մեկնարկին, այլև պատասխան գործողություններ չի ձեռնարկել:
«Միևնույն ժամանակ Հունգարիան իր համաձայնության դիմաց ստացել է պայմանագիր, որը նոր իրավունքներ է տալիս Ուկրաինայում հունգարական փոքրամասնությանը», – բողոքել է Բոսակը:
Եվրահանձնաժողովի ղեկավար Ուրսուլա ֆոն դեր Լյայենը հունիսի 12-ին հայտնել է, որ ԵՄ բոլոր երկրները համաձայնեցրել են միությանը Ուկրաինայի անդամակցության շուրջ բանակցությունների առաջին կլաստերի բացումը:
ՌԴ արտաքին գործերի նախարար Սերգեյ Լավրովը նշել է, որ ԵՄ–ն կփլուզվի, եթե Ուկրաինան անդամակցի այդ միությանը:
2022 թվականի հունիսին ԵՄ–ն Ուկրաինային և Մոլդովային թեկնածու երկրների կարգավիճակ է շնորհել։
Եվրամիությունում բազմիցս խոստովանել են, որ նման որոշումը մեծ մասամբ խորհրդանշական էր՝ նպատակ ունենալով Մոսկվայի հետ դիմակայությունում աջակցել Կիևին և Քիշնևին։
