Թրամփը հեռացրել է Իսրայելին Իրանի հետ բանակցություններից. NYT
ԱՄՆ նախագահ Դոնալդ Թրամփի վարչակազմը փաստացի դուրս է թողել Իսրայելին Իրանի հետ զինադադարի շուրջ բանակցություններից։ Այս մասին գրում է The New York Times-ը։
Պարբերականի տվյալներով՝ նման որոշման պատճառ են դարձել Իսրայելի վարչապետ Բենիամին Նեթանյահուի չափազանց լավատեսական կանխատեսումները՝ պատերազմի մեկնարկից առաջ։ Վերջինս համոզել էր Թրամփին, որ ԱՄՆ-ի և Իսրայելի համատեղ հարվածները կարող են հանգեցնել Իրանում գործող վարչակարգի անկմանը, սակայն այդ սցենարը չի իրականացել։
Արդյունքում Վաշինգտոնը որոշել է Իրանի հետ բանակցությունները վարել առանց Իսրայելի մասնակցության։ Նշվում է, որ ներկայում Իսրայելի իշխանությունները տեղեկատվություն են ստանում տարածաշրջանային դիվանագետների, սեփական աղբյուրների և հետախուզության միջոցով։
NYT-ը գրում է, որ այս զարգացումը լուրջ հարված է Նեթանյահուի դիրքերին, քանի որ նա երկար ժամանակ իրեն ներկայացնում էր որպես քաղաքական գործիչ, որը բացառիկ հասանելիություն ունի Թրամփին և կարող է ազդել նրա որոշումների վրա։
Միևնույն ժամանակ, պատերազմում Իսրայելի հիմնական նպատակները՝ իրանական ռեժիմի տապալումը, միջուկային ծրագրի ոչնչացումը և հրթիռային ծրագրի վերացումը, չեն իրականացվել։
