Սպիտակ տունը Վաշինգտոնի կենտրոնում զանգվածային աղոթքի հավաք կանցկացնի
ԱՄՆ նախագահ Դոնալդ Թրամփի վարչակազմի բարձրաստիճան պաշտոնյաները կիրակի օրը ելույթ կունենան Վաշինգտոնի կենտրոնում անցկացվող զանգվածային աղոթքի հավաքին, որի կազմակերպիչները հայտարարում են, թե այն ամրապնդում է երկրի կրոնական հիմքերը, սակայն քննադատներն ասում են, որ դա «քվազիպաշտոնական հանրահավաք է՝ ի պաշտպանություն քրիստոնեական նացիոնալիզմի», հաղորդում է AFP-ն։
Հրավիրված բանախոսների ցանկում են պաշտպանության նախարար Փիթ Հեգսեթը, պետքարտուղար Մարկո Ռուբիոն և Ներկայացուցիչների պալատի խոսնակ Մայք Ջոնսոնը։
Ակնկալվում է, որ նախագահ Դոնալդ Թրամփը տեսակապով կդիմի հավաքվածներին։ Այս միջոցառումը կազմակերպվել է Սպիտակ տան կողմից Ամերիկայի 250-ամյակի տոնակատարությունների ծրագրի շրջանակում, և տեսաուղերձում, որով Հեգսեթը ամերիկացիներին հրավիրել էր մասնակցել դրան, նա ասել էր, որ սա հնարավորություն է «վերստին նվիրաբերելու մեր հանրապետությունը Աստծուն և երկրին»։
Թրամփի իշխանության վերադառնալուց հետո ազդեցիկ քրիստոնեական նացիոնալիզմը մեծ ժողովրդականություն է վայելում, իսկ ավետարանականները կազմում են ԱՄՆ նախագահի աջակցության բազայի հիմնական տարրը։
Հեգսեթը ծայրահեղ պահպանողական ավետարանական եկեղեցու անդամ է, և Իրանի դեմ պատերազմի վերաբերյալ նրա ճեպազրույցներն առանձնացել են մարտաշունչ քրիստոնեական հռետորաբանությամբ։
Թեև նախորդ վարչակազմերն ու նախագահները պարբերաբար անցկացրել և այցելել են կրոնական հավաքներ, կիրակնօրյա միջոցառումը շարունակում է անսովոր մնալ իր մասշտաբով և կառավարության բարձրաստիճան անդամների ներկայությամբ։
Թվարկված մոտ 20 «կրոնական առաջնորդներից», որոնք հանդես կգան խոսքով, գրեթե բոլորը ավետարանական բողոքականներ են՝ բացառությամբ մեկ ռաբբիի և պաշտոնաթող կաթոլիկ արքեպիսկոպոսի։
