Թուրքիայի և Իրանի նախագահները քննարկել են տարածաշրջանային անվտանգության իրավիճակը
Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել Իրանի նախագահ Մասուդ Փեզեշքիանի հետ. հաղորդում է Anadolu-ն։
Ըստ Թուրքիայի նախագահին առընթեր հաղորդակցության վարչության՝ սոցիալական ցանցերում հրապարակած հայտարարության՝ երկու առաջնորդները քննարկել են հրադադարի և տարածաշրջանային անվտանգության իրավիճակը։
Էրդողանը նշել է, որ Թուրքիան հետևողական ջանքեր է գործադրում հրադադարի հասնելու համար՝ համագործակցելով շահագրգիռ երկրների հետ։
Թուրքիայի նախագահն ընդգծել է, որ առաջիկա բանակցությունները պետք է հնարավորինս լիարժեք օգտագործվեն՝ երկարատև խաղաղության և կայունության հասնելու համար։ Նա ընդգծել է, որ «կարևոր է հնարավորություն չտալ նրանց, ովքեր ձգտում են խաթարել այս գործընթացը»։ Նա հայտարարել է, որ Թուրքիան «պատրաստ է բարեկամ երկրների հետ համատեղ ամեն հնարավոր աջակցություն ցուցաբերել նոր գործընթացում»։
Թուրքիայի նախագահը շեշտել է, որ Անկարայի նպատակն է «տարածաշրջանում առողջ բանականության և երկխոսության նոր մթնոլորտ ստեղծել»։
