Ադրբեջանում պատգամավորը պատուհանից ցատկել է՝ մտերմուհու ամուսնուց խուսանավելու համար
Նախիջևանի նախկին պատգամավոր Ալի Աբբասովը կտրականապես համաձայն չէ իրեն պատգամավորական մանդատից զրկելու որոշման հետ, հաղորդում են ադրբեջանական լրատվամիջոցները։
Քաղաքական գործիչը, որի անունը աղմկահարույց սկանդալի կենտրոնում է հայտնվել, որոշել է մինչև վերջ պայքարել իր մանդատի համար։ Շնորհազուրկ նախկին պատգամավորը պաշտոնապես Գերագույն դատարան է բողոքարկել Կենտրոնական ընտրական հանձնաժողովի որոշումը։
Աբբասովի պատգամավորական լիազորությունները չեղարկելու պատճառն աղմկահարույց միջադեպի մասին հաղորդագրություններ էին։ Ըստ գործի նյութերի՝ ալկոհոլի ազդեցության տակ նա մտել է ծանոթ կնոջ տուն և անպարկեշտ առաջարկ արել։ Հայցում նշվում է, որ այդ պահին կնոջ ամուսինը հանկարծակի վերադարձել է, որից հետո պատգամավորը փորձել է փախչել՝ պատուհանից ցատկելով։ Սակայն նա հեռու չի գնացել. ամուսինը բռնել և հրապարակավ մերկացրել է նրան։ Կրքերը չեն հանդարտվել. մի քանի ժամ անց վիրավորված ամուսինը՝ դանակով զինված, պատասխան հարձակում է գործել Ալի Աբբասովի տան վրա։
Հաջորդած քաշքշուկի ժամանակ պատգամավորին ուղղված դանակի հարվածն իր վրա է ընդունել նրա ազգականը, որը նետվել է կասեցնելու հարձակվողին։
Պատգամավորի՝ կնոջ կամքին հակառակ անօրինական կերպով ուրիշի տուն թափանցելու փաստը ապացուցել չի հաջողվել, ուստի քրեական գործը կարճվել է։ Հետագայում խորհրդարանականի և կնոջ ընտանիքի միջև հաշտություն է կնքվել, և բողոքը պաշտոնապես հետ է կանչվել։
Այս իրադարձություններինման շրջադարձից ոգեշնչված՝ Աբբասովը միջնորդություն է ներկայացրել պատգամավորի պաշտոնում անհապաղ վերականգնման համար։
Դատարանի վերջնական որոշման մեջ ընդգծվել է, որ մանդատի չեղարկումը պայմանավորված է ոչ թե մասնավոր բողոքի առկայությամբ կամ բացակայությամբ, այլ պատգամավորի պաշտոնը վարկաբեկող գործողությունների կատարմամբ։
News.am
