Սյունիքի ճանապարհներին քարաթափումներ են եղել
Սյունիքի մարզի ավտոճանապարհներին քարաթափումներ են եղել, որոնց հետևանքով երթևեկությունը մի հատվածում դարձել է միակողմանի, մեկ այլ հատվածում` փակվել։ Այս մասին հայտնում է ՆԳՆ փրկարար ծառայությունը։
Նշվում է, որ Սյունիքի մարզային օպերատիվ կառավարման կենտրոնը քարաթափումների վերաբերյալ ահազանգեր է ստացել մարտի 27-ին և 28-ին։Դեպքի վայր են մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատներից մարտական հաշվարկներ։
Պարզվել է, որ քարաթափումներ են եղել Տաթև-Լծեն ավտոճանապարհի 15-րդ կմ-ին, Կապան-Քաջարան ավտոճանապարհի 7-րդ կմ-ին (երթևեկությունը դարձել է միակողմանի) և Հալիձորից «Սատանի կամուրջ» տանող ճանապարհահատվածում (փակվել է)։
Փրկարարները, ոստիկանության պարեկային ծառայության և ՃԱՆՇԻՆ-ի աշխատակիցների հետ համագործակցելով, նշված հատվածներում իրականացրել են սահմանազատման և քարերի հեռացման աշխատանքներ։ Երթևեկությունը վերականգնվել է։
