Թրամփի վարչակազմը հայտարարել է, որ ԱՄՆ-ն պետք է հայտարարի Իրանի նկատմամբ հաղթանակի մասին և «դուրս գա պատերազմից»
Սպիտակ տան արհեստական բանականության բաժնի ղեկավար Դեյվիդ Սաքսը ուրբաթ օրը հայտարարել է, որ ԱՄՆ-ն պետք է «հայտարարի հաղթանակի մասին և դուրս գա» Իրանի հետ պատերազմից։ Սա այն հազվադեպ դեպքերից է, երբ Դոնալդ Թրամփի վարչակազմի կարկառուն ներկայացուցիչը կոչ է անում դադարեցնել իրանական հակամարտությունը, գրում է Reuters-ը։
«Հիմա ամենահարմար ժամանակն է հաղթանակ հայտարարելու և հեռանալու համար»,- ասել է Սաքսը «All-In» փոդքաստի ժամանակ։
Նրա խոսքով՝ ԱՄՆ-ն թուլացրել է Իրանի ռազմական ներուժը։
«Ես համաձայն եմ, որ մենք պետք է փորձենք ելք գտնել։ Եթե էսկալացիան որևէ լավ բանի չի հանգեցնում, ապա պետք է մտածել, թե ինչպե՞ս հասնել դեէսկալացիայի։ Դեէսկալացիան, կարծում եմ, ենթադրում է հրադադարի շուրջ որոշակի համաձայնության ձեռքբերում կամ Իրանի հետ բանակցությունների միջոցով որևէ կարգավորում», – ասել է Սաքսը։
