Մեծ Բրիտանիայի ոստիկանությունն արգելել է Լոնդոնում իրանամետ երթի անցկացումը
Բրիտանական ոստիկանությունը հայտարարել է, որ արգելել է Լոնդոնում մարտի 15-ին կայանալիք իրանամետ երթը՝ հակաիրանական ցուցարարների հետ հնարավոր լարվածությունից խուսափելու համար։ Այս մասին հայտնում է Reuters-ը։
Լոնդոնի կենտրոնում «Ալ-Կուդս» երթն ամեն տարի կազմակերպվում է Մարդու իրավունքների իսլամական հանձնաժողովի կողմից, որը, ըստ ոստիկանության, աջակցում է Իրանի իշխանություններին։
Մեծ Բրիտանիայի ոստիկանությունը հայտարարել է, որ 14 տարվա ընթացքում սա առաջին անգամն է, երբ արգելվում է բողոքի ակցիան՝ ընդգծելով, որ մեծ են հասարակական անկարգությունների ռիսկերը։ Արգելքը տարածվելու է նաև հակաիրանական որևէ երթի անցկացման վրա։
Նախորդ շաբաթ բրիտանական ոստիկանությունը ձերբակալել է չորս տղամարդու, ովքեր կասկածվում են Իրանի հետախուզական ծառայություններին աջակցելու մեջ։ Ենթադրվում է, թե նրանք հսկողություն են իրականացրել Լոնդոնի հրեական համայնքի հետ կապ ունեցող մարդկանց և վայրերի նկատմամբ։
