Փեզեշքիանը հայտնել է հունվարյան ցույցերի ժամանակ շուրջ 400 զինվորականի սպանվելու մասին
Իրանի նախագահ Մասուդ Փեզեշքիանը հայտարարել է, որ հունվարին երկրում տեղի ունեցած անկարգությունների ժամանակ զոհվել է մինչև 400 զինվոր, առնվազն 2000 քաղաքացիական անձ դարձել է անմեղ զոհ։Այս մասին նա խոսել է Իրանի պետական հեռուստառադիոընկերության եթերում։
Անդրադառնալով ամերիկյան կողմի պնդումներին, թե Իրանը «չարիքի և ահաբեկչության բուժման վայր է, որտեղ սպանում են մարդկանց», Փեզեշքիանն ասել է․ «Երեկ ԱՄՆ նախագահը հայտարարել է, որ Իրանը կազմակերպել է 32000 մարդու զանգվածային սպանությունը։ Մենք զանգվածային սպանություններ կատարե՞լ ենք։ Մենք տրամադրել ենք վիճակագրություն և նույնիսկ նշված անձանց անձնագրերի համարները։ Ամեն ոք, ով պնդում է ավելի բարձր թվեր, պետք է ապացուցի դա։ Ավելին, հայտարարված թվերից ավելի քան 2000 մարդ անմեղ զոհեր են, 300-400-ը՝ զինվորականներ, որոնք սպանվել են օրենքն ու կարգը պաշտպանելիս»։
Հունվարի վերջին Իրանի արտաքին գործերի նախարար Աբբաս Արաղչին հայտարարել էր, որ հանրապետությունում անկարգությունների ժամանակ զոհվել է 3117 մարդ։
Բողոքի ցույցերն Իրանում սկսվել էին 2025 թ. դեկտեմբերի վերջին իրանական ռիալի կտրուկ արժեզրկման և հիպերինֆլյացիայի պատճառով։ Սկզբում բողոքի ցույցերի հիմնական թեման դարձել են փոխարժեքի կտրուկ տատանումները և դրանց ազդեցությունը մեծածախ ու մանրածախ գների վրա: Սակայն ավելի ուշ Իրանի մի շարք քաղաքներում բողոքի ցույցերը վերածվել են ոստիկանության հետ բախումների, իսկ կարգախոսները ստացել են քաղաքական բնույթ՝ թիրախավորելով Իրանի ներկայիս քաղաքական համակարգը:
