ԱՄՆ-ն և Ուզբեկստանը ստորագրել են առաջնահերթ ոլորտներում համագործակցության մասին երկկողմ համաձայնագրեր
Վաշինգտոն կատարած աշխատանքային այցի շրջանակներում Ուզբեկստանի նախագահ Շավքաթ Միրզիյոևը մասնակցել է մի շարք երկկողմ փաստաթղթերի ստորագրման արարողությանը և համատեղ նախագծերի ներկայացմանը։ Այս մասին հայտնել է Ուզբեկստանի նախագահի մամուլի ծառայությունը։
Ուզբեկստանի նախագահի ներկայությամբ ստորագրվել են երկկողմ փաստաթղթեր, այդ թվում՝ բենզալցակայանների ցանցի ստեղծման, ջրցան ոռոգման տեխնոլոգիաների ներդրման, կարևորագույն հանքանյութերի արդյունահանման և մատակարարման, թռչնաբուծության կլաստերի ստեղծման, գյուղատնտեսական արդյունաբերության և ֆինանսական շուկայի զարգացման, ինչպես նաև ներդրումային միջավայրի բարելավման նախագծերի իրականացման վերաբերյալ։
Միջոցառմանը մասնակցել են ԱՄՆ կառավարության և ֆինանսական հաստատությունների ներկայացուցիչներ, այդ թվում՝ առևտրային ներկայացուցիչ Ջեյմիսոն Գրիրը, նախագահի հատուկ բանագնաց Պաոլո Զամպոլին, Eximbank-ի նախագահ Ջոն Յովանովիչը, ԱՄՆ-Ուզբեկստան առևտրի պալատի նախագահ Քերոլին Լամը և այլոք։
Նիստին տեսակոնֆերանսի միջոցով մասնակցել են նաև Ուզբեկստանի տարածաշրջանային ղեկավարները։Իր ելույթում Միրզիյոևը նշել է, որ նոր, գործնական ձևաչափով անցկացվող ներկայիս հանդիպումը նախորդ կլոր սեղանի տրամաբանական շարունակությունն է, որն արտացոլում է տնտեսական գործընկերության անցումը ռազմավարական վստահության և փոխադարձ հետաքրքրության մակարդակի։
«Այսօր գործընկերների հուսալիությունը, կանոնների կանխատեսելիությունը և երկարաժամկետ համագործակցության հորիզոններն առաջնային են։ Հենց այս ոգով ենք մենք կառուցում մեր փոխգործակցությունն Ամերիկայի Միացյալ Նահանգների հետ», – հայտարարել է Միրզիյոևը։
Նա նաև ընդգծել է, որ տնտեսական օրակարգն Ուզբեկստանի և Միացյալ Նահանգների միջև ռազմավարական գործընկերության հիմնական հենասյուներից մեկն է։
Ըստ հաղորդագրության՝ նշվել են ԱՄՆ-ի հետ համատեղ աշխատանքի առաջնահերթ ոլորտները, այդ թվում՝ կարևորագույն հումքի, նավթաքիմիայի, էներգետիկայի, գյուղատնտեսության և թռչնաբուծության ոլորտներում նախագծերը։ Ընդգծվել է ԱՄՆ Միջազգային զարգացման ֆինանսական կորպորացիայի և ԱՄՆ Eximbank-ի աճող դերը՝ որպես գործարքների աջակցության համակարգային գործընկերներ։
Շեշտվել է նաև համատեղ Գործարարության և ներդրումների խորհրդի ներուժի ակտիվ օգտագործման կարևորությունը։
Ուզբեկստանի նախագահ Շավքաթ Միրզիյոևը Վաշինգտոնում նաև կմասնակցի Խաղաղության խորհրդի առաջին նիստին։
