Եվրոպացիները կողմ են բռնապետությանը
Ամեն հինգերորդ եվրոպացին կարծում է, որ բռնապետությունը երբեմն նախընտրելի է ժողովրդավարությունից, հաղորդում է Politico-ն՝ հղում անելով Progressive Lab վերլուծական կենտրոնի պատվերով AboutPeople ընկերության կողմից անցկացված հարցմանը։
Հարցումն անցկացվել է հինգ երկրներում՝ Հունաստանում, Ֆրանսիայում, Շվեդիայում, Մեծ Բրիտանիայում և Ռումինիայում: Հույների մոտ 76 տոկոսը դժգոհություն է հայտնել, թե ինչպես է իրենց երկրում գործում ժողովրդավարությունը՝ համեմատած Ֆրանսիայում՝ 68 տոկոսի, Ռումինիայում՝ 66 տոկոսի, Մեծ Բրիտանիայում՝ 42 տոկոսի և Շվեդիայում՝ 32 տոկոսի հետ:
«Վերջին տարիներին Ռումինիայի նման երկրները, որոնք արագ տնտեսական աճ են գրանցել, կարծես թե չեն ամրապնդում լիբերալ ժողովրդավարության նկատմամբ հավատը։ Հարուստ երկրներում, ինչպիսին է Շվեդիան, ժողովրդավարական ինստիտուտները ճնշման տակ են, և քաղաքացիների վստահությունը դրանց նկատմամբ նվազում է»,- ուսումնասիրության արդյունքները մեկնաբանել է Մանչեսթերի համալսարանի քաղաքագիտության պրոֆեսոր Դիմիտրիս Պապադիմիտրիուն:
Հարցման յուրաքանչյուր հինգերորդ մասնակիցը նշել է, որ որոշ դեպքերում բռնապետությունը կարող է նախընտրելի լինել։ Ավելին, յուրաքանչյուր չորրորդ մասնակիցը նշել է, որ չի առարկի, որ իրենց երկիրն ունենա ժողովրդավարական իրավունքները սահմանափակող առաջնորդ։
