Հայ հիմնադիրներ ունեցող DeepSat-ը խոշոր պաշտպանական պայմանագիր է կնքել ԱՄՆ Հրթիռային պաշտպանության գործակալության հետ
Հայ հիմնադիրներ ունեցող DeepSat ստարտափը հայտարարել է, որ ստացել է խոշոր պայմանագիր ԱՄՆ Հրթիռային պաշտպանության գործակալության (MDA) հետ, SHIELD ծրագրի շրջանակում։ Պայմանագիրը կնքվել է IDIQ (Indefinite-Delivery/Indefinite-Quantity) ձևաչափով, որի ընդհանուր առավելագույն արժեքը կազմում է 151 միլիարդ դոլար։
Պայմանագիրը նախատեսում է առաքելությունների լայն շրջանակ և ուղղված է նորարարական ու դիմացկուն պաշտպանական հնարավորությունների արագ մատակարարմանը, որոնք կբարելավեն ԱՄՆ պաշտպանունակությունը և կաջակցեն երկրի ազգային անվտանգության նպատակներին։
Պայմանագրի իրականացման ընթացքում DeepSat կկիրառի իր փորձը՝
իրական ժամանակում աշխատող տիեզերական համակարգերում,
ուղեծրում կիրառվող արհեստական բանականության ոլորտում,
ինտեգրված պաշտպանական լուծումների մշակման մեջ։
Այս լուծումները կօգնեն գործակալությանը արձագանքել զարգացող օպերացիոն պահանջներին և բարելավել պաշտպանական ենթակառուցվածքների արդյունավետությունը։
Ներսես Օհանյան, DeepSat-ի համահիմնադիր և գլխավոր տնօրեն, նշել է․ «Սա արտացոլում է մեր տեխնոլոգիայի ուժը, մեր առաքելությանը կենտրոնացած մոտեցումը և մեր հանձնառությունը՝ ապահովելու դիմացկուն, նոր սերնդի հնարավորություններ, որոնք կպաշտպանեն երկիրը և կաջակցեն մեր պաշտպանական գործընկերներին»։
IDIQ պայմանագիրը պետական գնումների ճկուն մեխանիզմ է, որը թույլ է տալիս պետական կառույցին նախապես ձևավորել վստահելի մատակարարների ցանկ և հետագայում՝ ըստ կարիքների, մրցույթ կազմակերպել առանձին առաջադրանքների համար։
DeepSat-ի ընդգրկումը SHIELD ծրագրում և նման մասշտաբի պայմանագրի ստացումը ցույց է տալիս, որ հայ հիմնադիրներ ունեցող տեխնոլոգիական ընկերությունները կարող են մրցունակ լինել գլոբալ պաշտպանական և տիեզերական շուկաներում։
