Թրամփը հայտարարել է, որ դեկտեմբերի 11-ին Կամբոջայի և Թաիլանդի ղեկավարների հետ կքննարկի հակամարտության կարգավորման հարցը
ԱՄՆ նախագահ Դոնալդ Թրամփը հայտարարել է, որ նախատեսում է հեռախոսազրույց ունենալ Կամբոջայի և Թաիլանդի ղեկավարների հետ՝ հակամարտության կարգավորման նպատակով։ Այս մասին Թրամփը հայտարարել է Սպիտակ տանը լրագրողների հետ հանդիպման ժամանակ։
Միացյալ Նահանգների ղեկավարը շեշտել է, որ այդ հակամարտությունը շարունակվում է արդեն երկար տարիներ։
«Ես արդեն մեկ անգամ կարգավորել եմ այն։ Կարծում եմ՝ կարող եմ դա անել բավականին արագ։ Վաղը մենք հեռախոսազրույց ենք պլանավորել Թաիլանդի և Կամբոջայի հետ։ Կարծում եմ՝ կարող եմ նրանց հարկադրել դադարեցնել մարտական գործողությունները», – ասել է նա։
Թաիլանդի և Կամբոջայի սահմանին բախումները վերսկսվել են դեկտեմբերի 7-ին՝ չնայած որ նրանք հոկտեմբերին խաղաղության հռչակագիր էին ստորագրել ԱՄՆ նախագահ Դոնալդ Թրամփի և Մալայզիայի վարչապետ Անվար Իբրահիմի միջնորդությամբ։
