Բոսֆորում շարունակվում են ռուս լողորդի որոնումները, ԱԹՍ-ներ են ներգրավել. աղբյուր
Բոսֆորում լողալուց հետո անհետ կորած ռուս լողորդ Նիկոլայ Սվեչնիկովի որոնման գործողություններում անօդաչու թռչող սարքեր են ներգրավվել: Այս մասին հայտնում է ՌԻԱ Նովոստին՝ հղում անելով իրազեկ աղբյուրին։
Որոնողափրկարարական գործողությունն իրականացվում է Բոսֆորի ամբողջ երկայնքով, այդ թվում՝ ջրասուզակների և ուղղաթիռի մասնակցությամբ: Ցամաքային որոնումներին միացել են կամավորները։
Աղբյուրը չի հստակեցրել ներգրավված դրոնների ճշգրիտ թիվը:
Ռուս լողորդի անհետացման կապակցությամբ հետաքննություն է սկսվել։
Հիշեցնենք` սպորտի վարպետի թեկնածու Նիկոլայ Սվեչնիկովը օգոստոսի 24-ին մասնակցել է Ստամբուլի Բոսֆորի նեղուցում միջմայրցամաքային լողին, սակայն եզրագծին չի հասել։
Լողորդներից հետո «Teknofest» փառատոնի շրջանակում մի քանի ռազմանավ է անցել Բոսֆորով: Կազմակերպիչները որևէ միջադեպի մասին չեն հայտնել:
Թուրքիայի օլիմպիական կոմիտեն Բոսֆորում միջմայրցամաքային լողի մրցումներ է կազմակերպում 1989 թվականից:
