«Փաշինյանին հեռացնելու մի ճանապարհ կա. ՀՀԿ-ն ունի առաջարկ». Հենրիխ Դանիելյան

ՀՀԿ ԵԿ ղեկավար Հենրիխ Դանիելյանն այն կարծիքին է, որ Նիկոլ Փաշինյանը Սյունիքի բանալին տվել է այլ պետության՝ ԱՄՆ-ին, որը տարածաշրջանի հետ կապ չի ունեցել:

«Տարածաշրջանում փոփոխություններ են տեղի ունենում Փաշինյանի և Ալիևի կեղծ խաղաղության թեզի շրջանակներում: Նոյեմբերի 9-ին էլ էին փաստաթուղթ ստորագրել, որն այն ժամանակ մեզ համար՝ ստորացուցիչ կապիտուլյացիոն, իսկ հետագայում՝ երազանք հանդիսացող փաստաթուղթ էր, բայց որևէ ստորագրված պայմանավորվածություն չպահպանվեց: Հիմա, այս երկուսը ստորագրել են մի փաստաթուղթ, որը խաղաղության մասին նույն կեղծ նարատիվներով տանում են առաջ, որը նույն կերպ որևէ նշանակություն չի ունենալու»,- 168TV-ի «Ռեվյու» հաղորդման ընթացքում ասաց նա:

Նա հիշեցրեց 2018-ից առաջ եղած իրավիճակը և հարց ուղղեց. «Սերժ Սարգսյանի կառավարման տարիներին երբևէ լսե՞լ էիք «Զանգեզուրի միջանցք» եզրույթը: Մենք դա լսել ենք 2018-ից հետո»:

Անդրադառնալով Արցախի էջը փակելու մասին Փաշինյանի հայտարարությանը, նա հետևյալ հարցադրումներն արեց. «Այսինքն՝ քո սխալ հաշվարկը 5000 և ավել հայորդու կյանք արժե՞ր: Այսինքն՝ քո քաղաքական փորձառություն ձեռք բերելը մեր վրա արժեցավ երկիր, սերունդ և մի սերնդի հատված, որը հաշմանդամ մնա՞ց»:

Նա նշեց, որ ներընդդիմադիր համերաշխությունն այս իրավիճակում զրոյացել է, և չեն կարողանում միասնական և ժողովրդի համար ընկալելի առաջարկով հանդես գալ. «Հիմա, ՀՀԿ-ն ունի առաջարկ, մենք ասում ենք՝ սիրելի ընդդիմադիրներ և սիրելի ժողովուրդ, մեր դիտարկմամբ՝ կա մի լեգիտիմ ճանապարհ՝ Փաշինյանին հեռացնելու, դա իմպիչմենտի գործընթաց ձևավորելն է, որը, որպես այդպիսին, ՀՀ-ում չի ձևավորվել այս 8 տարվա ընթացքում:

Եկեք՝ ձևավորենք գործընթաց, որը ժողովրդին կբերի ԱԺ, ԱԺ-ից կսկսվի պայքարը: Այսքան ժամանակ փորձել ենք, որ փողոցային պայքարից գնա ԱԺ շունչը, բայց չի ստացվել, հիմա ասում ենք՝ եկեք ԱԺ-ից սկսենք, մեզ ասում են՝ գնացեք, մարդ բերեք: Դրա համար եմ ասում՝ չենք կարողանում միասնական առաջարկ ձևավորել: Երբ ընդդիմությունը կձևավորի միասնական առաջարկ, այդ ժամանակ Նիկոլ Փաշինյանի կեղծ նարատիվները կսկսեն ջնջվել»:

Մանրամասները՝ 168TV-ի տեսանյութում