Իսկ եթե թշնամու դիվերսանտները մտնեն Մեղրի, գրոհեն մեր կրակակետերը, ի՞նչ եք անելու. Վովա Վարդանով
«Հայաստանի Հանրապետությունն ապաշրջափակվում է, Ադրբեջանն իր հերթին՝ հնարավորություն է ստանում Հայաստանի տարածքով հուսալի կապ ունենալ Նախիջևանի հետ»,- օրերս հայտարարեց Նիկոլ Փաշինյանը:
«Հայաստանի Հանրապետությունը հնարավորություն է ունենում Ադրբեջանի տարածքով և Նախիջևանի տարածքով Սյունիքի մարզի հետ երկաթուղային կապ ունենալ։ Հայաստանի Հանրապետությունը ստանում է հասանելիություն միջազգային երկաթուղային ցանցին դեպի Ռուսաստան, դեպի Իրանի Իսլամական Հանրապետություն, դեպի Կենտրոնական Ասիա, Չինաստան։ Մենք այս նախագծով ահռելի տարանցիկ բեռներ ենք հրավիրելու, կամ այդ բեռներն ուղղորդվելու են այս ճանապարհից օգտվելու, և դա ահռելի եկամուտներ է բերելու թե՛ Հայաստանին, թե՛ Ադրբեջանին»,- ասաց նա։
Նիկոլ Փաշինյանն ընդգծում է՝ «գործ ունենք մի շրջադարձային նշանակության պայմանավորվածության հետ, որից հրաժարումն օգտավետ չի կարող լինել կողմերից որևէ մեկին»:
Ողջ մնալու արվեստը (ՈՄԱ) հասարակական կազմակերպության ղեկավար Վովա Վարդանովն օգոստոսի 8-ին ԱՄՆ-ում կատարվածը՝ Սյունիքով Ադրբեջան-Նախիջևան անխոչընդոտ կապի ապահովումը, համարում է Հայաստանի համար վտանգներ կրող գործընթաց՝ միևնույն ժամանակ շեշտելով, որ վտանգին զուգահեռ՝ ունենք ժամանակ շահելու հնարավորություն։
«Հայաստանը մնում է բլոկադայի մեջ, Հայաստանին զրկում են Իրանով Հնդկաստան հասնելու հնարավորությունից։ Այս ամենն ուղղված է նաև Ռուսաստանի դեմ։ Հայաստանը զրկվում է տնտեսական օգուտներ ստանալու հնարավորությունից, բայց կա մի բայց՝ Հայաստանը ժամանակ է շահում»,- ասաց Վարդանովը։
Ի պատասխան հարցի, թե ի՞նչ անվտանգային խնդիրների մասին է խոսքը, Վովա Վարդանովը հիշեցրեց՝ որպես հետախույզ՝ գիտի հակառակորդի տարածք ներթափանցելու տարբեր ձևեր։
«Եթե 50 դիվերսանտ համապատասխան մետաղով շերտավորված կոնտեյների մեջ տեղավորվելով՝ գա Մեղրի, գրոհի այն կրակակետերը, որոնք հակառակորդի հարձակումը կարող են ճնշել, ի՞նչ եք անելու։ Կրկնում եմ՝ նման վտանգ կա, բայց կա նաև ժամանակ շահելու շանս»,- ասաց Վովա Վարդանովը՝ ընդգծելով՝ Հայաստանը պարտավոր է դառնալ ռազմականացված, ազգ-բանակ պետություն՝ թշնամու թիրախում չհայտնվելու համար։
Հարցազրույցի մանրամասները՝ տեսանյութում։
