Պատգամավորի ու նրա որդու մասնակցությամբ ծեծի միջադեպով կան ձերբակալվածներ
168.am-ը քիչ առաջ տեղեկացրել էր, որ ԱԺ «Քաղաքացիական պայմանագիր» խմբակցության պատգամավոր Սերգեյ Բագրատյանն ու նրա որդին` Շանթ Բագրատյանը, որն արդեն հասցրել է աչքի ընկնել քրեական պատմություններով, այսօր ծեծկռտուք է հրահրել։
ՆԳՆ-ից միջադեպի առնչությամբ 168.am-ի հետ զրույցում հայտնեցին` միջադեպի 3 մասնակից է ձերբակալվել և ներկայացվել Քննչական Կոմիտե։
168.am-ը ավելի ուշ կփորձի նաև մանրամասներ ճշտել ՔԿ-ից։
Ամեն դեպքում, մեր տեղեկություններով, կարծեք փորձ է արվում թեմայից հանել ՔՊ պատգամավոր Սերգեյ Բագրատյանի անունը։
Հիշեցնենք` ըստ մեզ հասած տեղեկությունների` ծեծի պատճառը եղել է քաղաքացու լեգիտիմ պահանջը` պատգամավորի 888 86 համարներով Տոյոտա մակնիշի մեքենան փողոցի սխալ կայանված հատվածից հեռացնելու մասին: Հայր և որդի Բագրատյանները չեն հանդուրժել դիտողությունը, և դիտողություն արած քաղաքացուն ծեծի են ենթարկել, որին փորձել են միջամտել պարեկները, որոնց ևս Շանթ Բագրատյանը քաշքշել է։
