Միջազգային քրեական դատարանը «Թալիբան»-ի առաջնորդի և Աֆղանստանի գերագույն դատարանի նախագահի ձերբակալման օրդեր է տվել
Միջազգային քրեական դատարանի նախնական դատական պալատը ձերբակալման օրդեր է տվել «Թալիբան» շարժման առաջնորդ Հայբաթուլլահ Ախունդզադայի և Աֆղանստանի գերագույն դատարանի նախագահ Աբդուլ Հաքիմ Հաքանիի նկատմամբ։
Այս մասին ասվում է դատարանի մամուլի հաղորդագրության մեջ։
«Այսօր՝ 2025 թվականի հուլիսի 8-ին, Միջազգային քրեական դատարանի II նախնական դատական պալատը Աֆղանստանում ստեղծված իրավիճակի համատեքստում ձերբակալման օրդեր է տվել «Թալիբան» շարժման գերագույն առաջնորդ Հայբաթուլլահ Ախունդզադայի և Աֆղանստանի գերագույն դատարանի նախագահ Աբդուլ Հաքիմ Հաքանիի համար, որոնք Աֆղանստանի փաստացի կառավարիչներն են 2021 թվականի օգոստոսի 15-ից», – ասվում է տեքստում։
Հունվարին «Թալիբան» շարժումը կտրուկ քննադատել է Միջազգային քրեական դատարանի գործողությունները: Աֆղանստանի արտաքին գործերի նախարարության հայտարարության մեջ, որը հրապարակվել է X-ում, կազմակերպությանը կոչ էր արվում չպարտադրել մարդու իրավունքների իր մեկնաբանությունն ամբողջ աշխարհին և հաշվի առնել երկրների կրոնական և ազգային առանձնահատկությունները:
