Գազայի հատվածում հիվանդանոցի և տեղահանվածների վրանների թիրախավորման հետևանքով 26 մարդ է զոհվել
Գազայի հատվածի բժշկական աղբյուրները հայտնել են, որ հունիսի 4-ի լուսաբացից ի վեր 26 պաղեստինցի է զոհվել անկլավի մի քանի շրջանների ուղղությամբ Իսրայելի շարունակական ռմբակոծության հետևանքով: Իսրայելական անօդաչու թռչող սարքերը նաև ռմբակոծել են Դեյր ալ-Բալահի ալ-Ակսայի նահատակների հիվանդանոցի շենքը, որը գտնվում է Գազայի հատվածի կենտրոնում:
Այս մասին հայտնում է Al Jazeera-ն։Զոհերից 14-ը գրանցվել են Գազայի հատվածի Խան Յունիսի արևմուտքում գտնվող դպրոցում տեղահանված անձանց համար նախատեսված վրանների վրա իսրայելական ԱԹՍ-ի հարվածի հետևանքով:
Ըստ լրատվամիջոցի՝ հունիսի 4-ի առավոտյան Իսրայելի ուժերը լայնածավալ հարձակում են սկսել նաև Արևմտյան ափի Ֆարա փախստականների ճամբարի և Տուբաս նահանգի Թամուն քաղաքի վրա՝ բուլդոզերներով քանդելով ենթակառուցվածքները և թալանելով տները։
Իսրայելական ուժերը նաև ձերբակալություններ են իրականացրել և ռազմական լրացուցիչ ուժեր տեղակայել Արևմտյան ափի հյուսիսում։
Գազայի հատվածի առողջապահության նախարարությունը հայտնել է, որ 2023 թվականի հոկտեմբերի 7-ից ի վեր Իսրայելի կողմից Գազայի հատվածում իրականացված ագրեսիայի հետևանքով զոհերի թիվը հասել է 54 607-ի, իսկ վիրավորներինը՝ 125 341-ի։
Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր գրեթե 1200 մարդ, գերեվարվել՝ շուրջ 250 մարդ։
