Ամենայն հավանականությամբ, Փաշինյանը նկատի ուներ, որ իրավապահների միջոցով բոլորին կլցնի պադվալ. Արմեն Գրիգորյան
Երեկ խորհրդարանում Կառավարության հետ հարցուպատասխանի ժամանակ Նիկոլ Փաշինյանն ասել էր, որ Անվտանգության խորհրդի քարտուղարն ամեն ամիս, երբեմն՝ ավելի հաճախ գրավոր կարգով, զեկուցում է մամուլում հրապարակված այն բոլոր տեղեկությունները, որոնք վերաբերում են կոռուպցիոն դեպքերին։
Այսօր Կառավարության հերթական նիստից հետո լրագրողների հետ ճեպազրույցում Արմեն Գրիգորյանը հաստատեց Նիկոլ Փաշինյանի ասածները` շեշտելով, որ Անվտանգության խորհուրդը հավաքում է մամուլում տեղ գտած բոլոր նմանօրինակ հրապարակումները, կազմում է ամբողջական զեկույց և տեղեկացնում Նիկոլ Փաշինյանին։
«Նիկոլ Փաշինյանը սրա մասին է խոսել, այս աշխատանքը մենք երկար ժամանակ կատարում ենք։ Այսինքն՝ կոռուպցիայի մասին մամուլում տեղ գտած հնարավոր բոլոր ինֆորմացիաները… մեր հիմնական ուշադրությունը, բնականաբար, նաև Կառավարության անդամների, ՏԻՄ մարմիններում աշխատող քաղաքացիների նկատմամբ է»,- նշեց Արմեն Գրիգորյանը։
Արմեն Գրիգորյանը շեշտեց, թե կոռուպցիան համարում են ազգային անվտանգության սպառնալիք։
«Կոռուպցիայի դեմ պայքարը Կառավարության համար առաջնահերթություն է, Անվտանգության խորհուրդը նաև դրա շրջանակներում աշխատանքներ է կատարում»,- ընդգծեց Արմեն Գրիգորյանը։
Լրագրողները նրանից հետաքրքրվեցին՝ Նիկոլ Փաշինյանը երեկ ԱԺ ամբիոնից ընդդիմադիր պատգամավորներին սպառնում էր լցնել ԱԱԾ պադվալը, արդյո՞ք նա նման լիազորոթւյուններ ունի: Արմեն Գրիգորյանը պատասխանեց՝ ամենայն հավանականությամբ, Նիկոլ Փաշինյանը նկատի ուներ, որ իրավապահ մարմինների միջոցով այդ ամենը կանի։
Հիշեցնենք, որ երեկ խորհրդարանում Կառավարության հետ հարցուպատասխանի ժամանակ Նիկոլ Փաշինյանը կրկին հունից դուրս եկավ, երբ «Հայաստան» խմբակցության պատգամավոր Աննա Գրիգորյանը նրան հարց տվեց Նորքի թաղապետարանում տեղի ունեցածի, կոռուպցիայի վերաբերյալ, ասելով, թե՝ եթե մամուլի հրապարակումներով առաջնորդվեին, ապա ընդդիմությանը հիմա հանել էին կախաղան և առհասարակ Հայաստանից արտաքսել էին։
«Բա մամուլի հոդվածներում ձեր մասին ինչե՞ր են գրում, Ձեր մասին գրում են, որ դուք օտարերկրյա շպիոններ եք, դուք ի՞նչ գործ ունեք այս դալիճում։ Մամուլի հրապարակումներով եթե առաջնորդվեմ, ապա սաղիդ տանելու եմ լցնեմ ԱԱԾ պադվալը»,-խոսքն ուղղելով ընդդիմադիր պատգամավորներին՝ ասաց Նիկոլ Փաշինյանը։
Մանրամասները՝ 168.am-ի տեսանյութում
