Իսրայելի վարչապետն ասել է, որ ինքն «այլ ելք չունի», քան շարունակել մարտերը Գազայում
Իսրայելի վարչապետ Բենիամին Նաթանյահուն շաբաթ օրը կրկին հայտարարել է, որ Իսրայելը «այլ ելք չունի», քան Գազայում մարտական գործողությունները շարունակելը և չի ավարտի պատերազմը, քանի դեռ չի ոչնչացրել ՀԱՄԱՍ-ը, չի ազատել պատանդներին և չի ապահովել, որ այդ տարածքը սպառնալիք չլինի Իսրայելի համար, հաղորդում է Associated Press-ը:
Իսրայելի վարչապետը նաև կրկնել է իր խոստումն այնպես անել, որպեսզի Իրանը երբեք միջուկային զենք չունենա։
Հայտարարության մեջ նա նշել է, որ ՀԱՄԱՍ-ը մերժել է Իսրայելի վերջին առաջարկը՝ ազատ արձակել պատանդների կեսին ևս մեկ ժամանակավոր զինադադարի դիմաց:
ՀԱՄԱՍ-ը հայտարարել է, որ ազատ կարձակի մնացած պատանդներին միայն Իսրայելի զորքերի դուրսբերման և երկարաժամկետ զինադադարի դիմաց, ինչպես պահանջում է համաձայնագիրը, որը Իսրայելը խզել է:
Գազայի առողջապահության նախարարությունը շաբաթ օրը հայտնել է, որ Իսրայելի հարվածները 48 ժամվա ընթացքում ավելի քան 90 մարդու կյանք են խլել։ Իսրայելական զորքերը սաստկացնում են գրոհները, որպեսզի «ՀԱՄԱՍ-ին ստիպեն ազատ արձակել պատանդներին և զինաթափվեն»։
Հիվանդանոցի անձնակազմի տվյալներով, գիշերվա ընթացքում զոհված 15 մարդկանց թվում են երեխաներ և կանայք:
Զոհվածներից առնվազն 11-ը գտնվում էին հարավային Խան Յունիս քաղաքում, նրանցից մի քանիսը ՝ Մուվասի շրջանում գտնվող վրանում, որտեղ հարյուր հազարավոր տեղահանված մարդիկ են ապրում, հայտնել են հիվանդանոցի աշխատակիցները: Իսրայելն այն հռչակել էր հումանիտար գոտի։
