Հյուսիսային Մակեդոնիայի գիշերային ակումբներից մեկում բռնկված հրդեհի հետևանքով 59 մարդ Է զոհվել, ավելի քան 155-ը՝ վիրավորվել
Առնվազն 59 մարդ Է զոհվել, ավելի քան 155-ը՝ վիրավորվել Հյուսիսային Մակեդոնիայի գիշերային ակումբներից մեկում բռնկված հրդեհի հետևանքով, հայտնում են պաշտոնական անձինք:
Ինչպես տեղեկացնում է BBC-ն, հրդեհը բռնկվել է տեղական ժամանակով մոտ 02:30-ին մայրաքաղաք Սկոպյեից մոտ 100 կմ արևելք գնվող Կոչանի քաղաքի Pulse ակումբում, որտեղ 1500 մարդ ներկա է գտնվել DNK-ի՝ երկրում հայտնի հիփ-հոփ դուետի համերգին:
Վարչապետ Քրիստիան Միկոսկին այս օրը «դժվար և շատ տխուր» է անվանել երկրի համար, որը շատ «երիտասարդ կյանքեր» է կորցրել:
Չորս մարդու ձերբակալման օրդերներ են տրվել, դեպքի վայրում հայտնել է ներքին գործերի նախարար Պանչե Տոսկովսկին՝ չմանրամասնելով դեպքի հանգամանքները: Ավելի վաղ նա հայտարարել էր տղամարդու ձերբակալության մասին, իսկ «Միա» պետական լրատվական գործակալությունը հայտնել էր, որ ակումբի սեփականատերը ձերբակալվել է:
Տոսկովսկին նաև հայտնել է, որ նախնական հաղորդումների համաձայն՝ հրդեհը սկսվել է հրավառ սարքերի կայծերի պատճառով, որոնք դիպել են դյուրավառ նյութից պատրաստված առաստաղին:
Կադրերում երևում է, թե ինչպես է խումբը նվագում բեմում, երբ պայթում են երկու ազդանշանային հրթիռներ, կայծերն այնուհետև բռնկվում են առաստաղի վրա, իսկ հետո արագ տարածվում:
